Lachid Amyu Sha Kahtawlik Hpung Masha Ni A Shawng Ning Nan Lang Na Lachid Amyu Sha Ga Hte MISSA Hkungga Nawng

September, 18,2023

Lahta Sam Mung, Mungmyit Sinli Ga, Lashu Kahtawlik Saradaw Ginwang , Lashu Muklum ,Wasaradaw a jawng wang Yesu A Salum nawku jawng hta (2023,Sep,16) ya Bat hpang Kru ya jahpawt (11;00)am aten Wunpawng Lachid Amyu sha Kahtawlik nawku hpung masha ni a shawng ning nan lang ngu na Lachid Amyu sha ga hte nawku MISSA hkungga hpe awng dang ai hte galaw la lu sai lam chyelu ai.

Ndai Wunpawng Lachid Kahtaw lik hpung Masha ni a shawng ning nan lang ngu na Lachid Amyu sha ga hte MISSA hkungga hpe Lashu Kahtawlik Sasana ,Saradaw Ginwang , Ginwang Up Sagu rem wa , Wasaradaw Luka Jumhpauk Dau Ze woi awn let Wa Jau Luksing Ying Bawm hte Wa Jau Luksing Sau Luk ni kawn nawku MISSA hkungga hpe nawng ya lai wa sai . MISSA hkungga hta Wasara Daw Luka Jumhpauk Dau Ze kawn Lachid ga hku hpung masha ni hpe mungga htawn ya ai.

Ndai MISSA hkungga nawku hpawng hta Yesu A Salum Ma Ma hpung ni hte St Paul Ma Ma hpung ni, Lachid amyu sha ga hku Nawku akyu hpyi ga gale Kommiti ni, Myitkyina Kahtawlik Sasana de na Kahtawlik hpung Masha Wunpawng Lachid amyu dat kasa Dr Galau Ying Bawm ,

Kawng Hka hte Kuthkai Jau ginwang de na dat kasa ni, Loi Hkam Jau ginwang de na ginwang up jau WaJau Luksing Sau Luk, Ma Ma Luksing Kyang Lwi hte Slg Luksing Kyang Bawm, Mung Dim , Bung Mun,hte Man Bang mare de na dat kasa ni Lachid amyu sha hpung masha ni hte Lashu Muklum hte makau grup yin de na Lachid hpung masha ni marai (100) jan sadu shang lawm ai lam chye lu ai.

Mungmyit Sinli ga,Lashu Kahtawlik Sasana , Lashu Saradaw Ginwang kata hta e Lachid amyu sha Wa Jau marai (4) nga sai lam chyelu ai, (1) Wa Jau Igino Luksing Ying Bawm ,shawng ning nan na Lachid amyu sha Wa Jau re (1992- Jau tai). (2) Wa Jau John Luksing Sau Luk, nambat lahkawng ngu na Lachid amyu sha Wa Jau (1994-Jau tai) , (3) Wa Jau Thomas Luksing Kyang Ying , nambat masum ngu na Lachid amyu sha Wa Jau (1997- Jau tai), (4) Wa Jau Lagwi Augustine , ni rai ma ai.

2023 ning September (16) ya shani gaw anhte Wunpawng Lachid Kahtawlik hpung masha ni a matu laklai ai Karai Kasang a shaman chyeju hkam la lu ai Labau shang nhtoi rai nga ai. Chyu Rum ai Wunpawng Amyu sha ni rai nga ai, Zai Wa, Li Su, Ra wang , Lachid ,Lhaovo hte Jinghpaw ndai amyu lakung ni kaw Lachid amyu sha ni mung lawm nga ai. Lachid hte Lhaovo amyu sha ni a Laili laika hpe “Sara kaba Luka Lahung Hawng Lum” kaw nna (1975) ning hta gyin shalat da ya ai re lam sagawn chye lu ai. Lachid Amyu sha ni gaw Laili laika lu hpang ai shaning (50) ram na wa sai rai tim laiwa sai ten hta Lachid Kahtawlik hpung masha ni a matu tinang Lachid amyu sha aga/laika hte ga gale da ai Chyum laika ,Nawku akyu hpyi laika hte Nawku mahkawn laika buk ni nlu shi ai majaw MISSA hkungga Nawku shakawn ai lam hpe rai n lu galaw shi ai re lam chyelu ai.

Rai tim (2020) ning kaw nna Lashu Kahtawlik Sasana Sagurem Wa, Wasaradaw Kaba Hpilip Lasap Ze Hawng hte Wa Saradaw Luka Jumhpauk Dau Ze, yan a lam woi matsun ai hte maren Lashu Sasana kata na Lachid Kahtawlik hpung masha ni hte Myitkyina Sasana de na Lachid Kahtawlik hpung masha ni ta gindun let tinang Lachid amyu aga /laika hte Kahtawlik nawku hpung akyu hpyi ga ni , nawku shakawn mahkawn laika ni hpe ga gale la lu na matu Kommiti hpe Lashu Kahtawlik nawku jawng wang kata na San Taresa Gawknu hta hpaw sha bawn la lu sai , dai Kommiti hta Lachid amyu sha Wa Jau ni rai nga ai, Wa Jau Igino Luksing Ying Bawm , Wa Jau John Luksing Sau Luk ni shang lawm let, Kommiti Ningbaw Slg Johnny Mading Chang Ying, N/T ningbaw Slg Zahkung Hkaw Bawm hte Hpung Sara ni , Myitsu Du Salang ni , Kanu Kawa ni shang lawm ai lam chyelu ai.

Madung hku nna Myitkyina Sasana de na Dr, Galau Ying Bawm hte Lashu Sasana de na Sara Luksing Kyang Ting yan ka da nhtawm Wa Jau ni hte Kommiti Salang ni kawn bai jep jen da ngut ai hpang Wasara daw Luka Jumhpauk Dau Ze hte Wasaradaw Kaba Philip Lasap Ze Hawng (hkring sa) yan kaw nna masat masa galaw shagrin ya ai re lam chye lu ai.

Ya na zawn Lachid Kahtawlik hpung masha ni a matu tinang a amyu sha ga/ laika hte nawku sha kawn akyu hpyi ga ni laika ni hpe byin tai wa hkra ahkaw ahkang jaw ya ai Wa Karai Kasang a chyeju hpe shakawn ai,A hkaw ahkang jaw Lam woi la ai Wasaradaw yan hte Wa Jau ni , lam amyu myu hku nna shang lawm madi shadaw ya ai ni , akyu hpyi ya ai ni yawng hpe n dang tsun hkra chyeju dum ga ai lam lit nga ai Salang ni kawn shana wa ma ai.

Matut nna , 2023, September(17) ya Laban shani (11:00)am aten hta Lashu Jau ginwang kata na Mung Dim , mare hta Wa Jau Lashi Brang San Awng , woi awn let nambat lahkawng lang ngu na Lachid Amyu sha ga hku Nawku MISSA hkungga hpe awng dang ai hte galaw la lu sai lam matut chye lu ai.