Laban Shani Na Karai Mungga Gaw Anhte Myit Hprang Shangun Ai

Wa Sarabyin Francis, shaning shagu, Du Sa Ladaw a masum ngu na laban hpe “The Sunday of the Word of God” Karai Mungga Laban” ngu, lai wa sai shaning 2019, September 30 ya shani, the Apostolic Letter, Motu proprio “Aperuit illis” ngu ai ginlam ga baw hte masat da ya ai.

Karai Mungga hpe shagrau na matu, Karai Mungga hpe myit sumru na matu hte dai hpe garan gachyan na matu yaw shada let dai shani hpe masat ai rai nga ai.

Anhte A Prat Hta Chyoi Pra Chyum Laika A Ahkyak Ai Lam

Karai Mungga Laban shani gaw shinggyim masha ni a matu Karai Mungga a ahkyak ai lam hpe shadum ya ai. Kam sham ai masha ni gaw Chyoi Pra Chyum Laika hpe hti sumru ai a marang e, anhte a sak hkrung lam hta Karai Kasang hte aten shagu gamung dup ga shaga ai lam hpe byin shangun ai rai nna, dai gaw akyu hpyi hpang ai kaw nna hpang wa ai rai nga ai.

Dai shani gaw Nawku Hpung kawn htuk shapraw ai laika ni, grau nna, the Praenotanda of the Ordo Lectionum Missae,” hpe hti sumru na a hkaw ahkawng (hkinjang, ginwan, ginshan) lu ai nhtoi langai nan rai nga ai ngu Wa Sarabyin tsun da nga ai. Dai Laika Buk gaw sumru lam daw (10) hku garan da ai lam chye lu ai. Shawng na (1) ngu na daw gaw Nawku Daw Jau lamang hta Kabu Gara Shiga hpe hti ndau ya ai lam galaw nna Karai Kasang Shi a myusha ni hpe Hkristu hta shaga ai lam rai nga ai.

Dai shani gaw, Kabu Gara Shiga Laika Chyum Laika Buk hpai shinggrup ai, shing n rai, nawku tawn de hpai sa nna hkungga lara di shagrau ai lam ni galaw bai nga ai.

Nawku Hpung kawn masat da ai hti ang ai chyum laika daw ni hpe sha hkrak tup hti sumru na matu mung dai ndau laika hta shadum da ai. Dai hti ang ai masat da ai chyum laika ni a malai kaga laika ni hpe galai hti nmai ai lam tsun ai rai nga ai.

Mungga htawn ai shaloi mung Wa Saradaw, Wa Jau ni hte Deacon ni Chyum laika hpe atsawm chye na hkawn hkrang hkra hti sumru nna, nawku hpung masha wuhpung wuhpawng ni hpe Chyum mungga lachyum hpe hkrak chye na hkra hkaw tsun sakse hkam na matu Kanu Nawku Hpung kawn aja awa shadum n gun jaw da ai.

Nawku daw jau lamang aten hta atsin sha nga nna Karai Mungga hpe sim sa ai hku madat hkam la nna myit sumru na gaw grai ahkrak ai.

Nawku daw jau lamang ni hta Chyum hti ai shaloi, copy galaw da ai zawn re ai, sumla gayat da ai zawn re ai, bai kaga ladat hku galaw da ai lam ni hpe n jai lang na matu mung shadum da ai. Tsun mayu ai gaw tara shang htuk shapraw da ai nawku daw jau laika buk ni hte Chyum Laika buk ni hpe sha jai lang na matu n gun jaw ai rai nga ai.

Dai gaw Chyum laika buk hte nawku daw jau laika buk ni hpe manu shadan ai lam rai nna, nawku hpung a hpe shatsaw ai hte Karai Mungga hpe manu shadan hkung ga shagrau ai rai nga ai. Dai majaw Nawku Hpung kawn masat da ai madang hpring ai hta hkan sa hkan shatup na matu n gun jaw ai re lam mung laika hta shadum da ai.

Karai Mungga Laban hte seng nna htuk shapraw da ai shadum ndau laika hte maren hkan sa lu na matu Nawku Hpung masha shagu dum chye u ga yaw shada let Vatican Shiga Dap kaw nna ndau da ai shiga hpe RVA Jinghpaw Nsen Shapoi Dap kawn shalai ndau dat ga ai.

“Tsawra Myit Kaba a matu, Karai Mungga hta hkawm sa ga.” (San Jerome)

Translated by Fr. Patrick Gawmaw Hkawng Yae

#vaticannews

#rvakachinservice

19 December 2020, 12:22

https://www.vaticannews.va/en/vatican-city/news/2020-12/sunday-of-the-word-of-god-a-day-of-awakening.html