Korona Virus A Majaw Italy Mungdan Hta Wa Jau Marai 10 Si

Catholic News Agency (CAN) Kahtawlik Shiga Dap (Agency) kawn 2020, March, 16 hta COVID-19 coronavirus a majaw nlaw htum Jau marai (10) si mat sai lam shiga jaw da ma ai. Si mat ai ni hta na kaang hkup jan gaw Lombardy na Milan mung daw shinggan maga nga ai Bergamo Saradaw Sasana kaw na rai ma ai lam chye lu ai.

Bergamo kaw na Saradaw gaw Italy mungdan kata coronavirus ana zingli tsin yam hkrum sha di ai gaw Bergamo Saradaw sasana hta re lam 2020, march 16, bat langai ya shani tsun dat nga ai. Dai Sasana hta magam gun nga ai Jau marai (20) hpe tsi rung kaba hta tsi lajang la na matu hkyen nga ai ten Jau marai (6) si mat ai lam chye lu ai.

“Jau nkau mi hta dai ana zingli a majaw grai tsang ra ai madang hta nga nga ma ai rai nna, tsi lajang nga ai” nga na Bergamo Saradaw Sasana kaw na Saradaw Francesco Beschi gaw Italian Radio nseng shapoi dap kaw March 16 hta shapoi da nga ai.

Ndai ana zingli a tsin yam hta si htum mat ai masha law law rai nga sai hte dai tsin yam hkrum sha nga ai machyi masha yawng hte rau anhte ni machyi kaba hpe rau jawm hkam sha ra nga ga ai. Anhte ni dai tsin yam hkrum ai ni hte rau langai sha rai nga ga ai, n-garan ginhka hkat ga ai” nga nna Inblu Radio shapoi dap kawn mung Wa Saradaw Beschi shapoi da nga ai.

Anhte ni ayan na nhkrum sha ga ai lung dat yu dat re prat mahkrum madup hpe hkrum sha nga saga ai nga nna Wa Saradaw Bruschi gaw March 15 na shi a mungga hta tsun da nga ai.

Coronavirus ana kap ai masha 27,000 lahta de rai sai rai nna, 2,470 gaw dai ana a majaw lai wa sai bat masum lapran hta si htum mat sai lam chye lu ai.

Italy mungdan hta Coronavirus a majaw si mat sai Jau ni nkau ni gaw (1) Wajau Silano Sirtoli, 59, (2) Wajau Giancarlo Nava, 70, (3) Wajau Agelo Cretti, (4) Wajau Diego Gabusi, (5) Wajau Giovanni Girelli, (6) Monsignor Vincenzo Rini ran ni rai ma ai da.

Cremona Saradaw Sasana kaw na Wa Saradaw Antonio Napolioni gaw Lai wa sai (10) ya ram tsi tsi lajang nna mai tsai wa ai majaw tinang magam gun ai shara de March 16 hta bai nhtang sa da sai lam chye lu ai. Shi hpe 14 ya na jang coronavirus bai jep sagawn ai lam galaw sa wa na re lam shi a Saradaw sasana kawn shapraw ai laika hta tsun da ai lam chye lu ai.

Asak 98 ning rai sai Miwa gumsan mungdan kaw na Saradaw Joseph Zhu Baoyu mung lai wa sai February 14 ya hta tsi lajang ai kaw na mai tsai wa sai lam China News Agency (CAN) kawn tsun da nga ai.

Pyintik mungdan, Angers Saradaw sasana na Wa Saradaw Emmanuel Delmas mung Vatican kawn lai wa sai bat hta sa du nna bai nhtang wa ai shaloi coronavirus ana jep yu yang COVID-19 positive rai taw nga ai lam March 16 hta pyintik mungdan shiga dap kawn tsun praw da ai hpe chye lu ai. Shi a ana grai nsawng shi ai masa hta naw nga nga ai majaw ya ten hta ahkak la ai lam nnga shi ai nga nna Angers Saradaw sasana kawn tsun da nga ai.

Bergamo Saradaw sasana kaw na Wa Saradaw gaw shi a Saradaw sasana kaw na Jau nkau mi mai tsai wa nna tsi lajang nga ai kawn shabai dat ya ai majaw myit awai la lu ai nga na tsun da nga ai. Matut nna mung shawang tsawra myit kaba hte garum shingtau la ai ni law law nga taw majaw myit n gun lu ai nga nna tsun da nga ai. Shi tsun ai gaw “dai coronavirus ana zingli kap taw nga ai Wajau ni hkum nan shawang tsawra myit kaba tim kamsham ai ni hte rau misa hkungga nawng jau nlu mat sai. Daini, anthe jau ni hkum nan sadi maja let kamsham ai hpung masha ni hte ni htep ai hku nga ai hta, maga mi kaw madu yesu hpe hpai sa ya nga ai raitim maga mi hta Coronavirus ana zingli hpe gun sa nga ai zawn tai nga ai hpe dum hprang nga ga ai” nga nna Wa Saradaw matut tsun da nga ai.

Ndai shiga hpe RVA Ginjaw kawn 2020, March 17 hta sawk sagawn shapoi da ai hpe Anhte RVA Kachin Service shiga dap kawn shalai shapoi dat ya ga ai.