Korea Mungdan Hta Shawng Ningnan Jau Tai Wa Ai San Andrew Kin A (200) Ning Hpring Masat Dingsat Nhtoi

Korea Mungdan Hta Shawng Ningnan Jau Tai Wa Ai San Andrew Kin A (200) Ning Hpring Masat Dingsat Nhtoi

August 21, Bat 6 ya shani, Korea Mungdan, Kahtawlik Sasana shang ai hpang, shawng ningnan Jau tai ai, Korea Jau San Andrew Kim Taegon a (200) ning hpring masat dingsat lamang hpe Korea Mungdan, Kahtawlik Hpung masha ni angwi apyaw galaw lai wa sai lam chye lu ai.

1821, August 21 ya shani shangai chying hkai wa ai Adrew Kim Taegon gaw 1846, September 16 ya shani makam masham a majaw sat hkrum lai wa ai rai nna, 1984 shaning hta San Pra Masha dang hkrum ai rai nga ai.

Ndai Wa Jau Andrew Kim a (200) ning masat dingsat shaning gaw Jubilee hte mung seng nga ai majaw, 2020, November 29 – 2021 Noverber 27 lapran hpe Jubilee shaning ngu Korea Saradaw hpawng, “the Catholic Bishops Confrence of Korea (CBCK)”, kawn masat da ma ai.

Jubilee ga baw ginlam, “theme” hpe gaw “Are you a Cahtolic faithfu?”, “Nang, teng sha, Kahtawlik Hpung masha rai kun?” ngu ai rai nga ai.

Ndai ga san gaw Kim ramma naw rai nga ai ten chyahkring hkring san katut ai ga san re ai lam chye lu ai. Asak 25 ning hpring ai aten hta she, “Rai nngai, ngai Kahtawlik rai nngai” ngu hkrak htai lu wa ai ngu sakse hkam da ai. Dai gaw shi a Kahtawlik makam masham prat hta hkawm sa ai sari manu hpe atsawm chye na sai ngu tsun ai rai nga ai.

1846, Sepember 16 ya shani du htau sat hkrum lai wa ai shawng nnan Korea Jau mung rai nga ai. Shi hpe du htau sat ai shara gaw, ya aten, Seoul mare kaba, Yongsan ginwang/ginra, Ichon-dong na Saenamteo Martyrs’ Shrine nga ai shara rai nga ai.

1845 shaning, Shanghai Cathedral Nawku Jawng kaba hta Jau tai ai hpang shata 13 ngu na shata hta du htau sat hkrum ai rai nga ai. Shi hte rau, sat hkrum ai Kerea myusha, Kahtawlik hpung masha 103 hpe 1984, May 6 ya shani, Wa Sarabyin Yawhan Pawlu II San pra masha dang da ai rai rai nna “feastday” poi nhtoi hpe September 20 ya shani masat da ai rai nga ai. Daini hta myu shayi  15 mung lawm ai. Wa Sarabyin Yawhan Pawlu II hkum nan Wa Jau Kum hpe du htau sat ai masat dingsat shara, “the Shrine of Solmoe kaw sa du hkungga jaw akyu hpyi lai wa sai re lam mung chye lu ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2021-08/korea-andrew-kim-first-priest-birth-bicentenary-martyr.html