KMSS-Myitkyina Woi Awn Ai Danai IDPs Camp Hte Buga Nawku Hpung Shagu Na Ramma Ni A Fellowship Lamang Galaw

KMSS - Myitkyina ni woi awn galaw ai, Danai IDPs Camp ( 3 ) hte Danai kaw nga ai Nawku Hpung shagu na ramma ni a hkrum zup hpawng Youth Fellowship lamang hpe 6-3-2022 ya shani Danai Kinsara lawk kaw hpaw tawn da ai St. Joseph IDPs Camp hta galaw la lu sai lam chye lu ai. 

Lamang a yaw shada lam  gaw simsa lam hte tara rap ra lam a matu madung yaw shada ai rai nna  buga kaw shanu nga ai makam masham n bung, ning mu n bung, htung hking lailen n bung ai ramma ni shada da grau mahkrit shawn, hku hkau kanawn mazum wa lu na matu rai nga ai.

Simsa lam ngu ai shaloi ga baw grai kaba ai raitim ya na zawn ramma ni hpe hkrum zup lamang galaw ya ai gaw simsa lam hpe npawt gaw de hpang ai lam rai nga ai. Ramma ni sha nrai, yawng hpe galaw ya ra ai raitim ya na masa hta hkan nna mai byin ai kaw na galaw hpang ai re lam lamang hpe woi awn galaw ai KMSS_Myitkyina Karuna Bawng Ring Dap magam gun Shd. Lawrence Ga La Seng tsun ai.

KMSS-Myitkyina hku nna Danai  buga nawku hpung shagu na ramma ni a hkrum zup hpawng hpe shawng nnan lang galaw hpang ai rai nna, hpang de mung matut madi shadaw garum sa wa na lam nga ai. Hkrum zup hpawng hta shang lawm ai ramma ni mung shanhte a pan hta shawng nnan lang lawm yu ai rai nna grai kaja ai lamang re majaw hpang de mung  matut galaw mayu ai lam tsun ai.Youth Fellowship lamang hta ramma ni marai ( 120 ) daram shang lawm ai lam chye lu ai.

Shiga - Julia Ja Ing