Kawsi Hpang Gara Hkrum Sha Nga Ai Ni A Matu Yaw Shada Let Wa Sarabyin Lak San Missa Nawng Ya Ai Lam

Wa Sarabyin: Kawsi Hpang Gara Hkrum Sha Nga Ai Ni A Matu Yaw Shada Let Laksan Missa Hkungga Nawng Jau Ya Ai

Wa Sarabyin Francis, March 28, bat 6, ya jahpawt, Casa Santa Marta Nawku Htingnu kaba hta nawng jau ai misa hkungga gaw Corona virus ana zingli tsing yam kaba a majaw kawsi hpang gara hkrum nga ai mungkan masha yawng a matu re.

 “Daini na nhtoi ni hta mungdan law malawng, Corovavirus ana zingli, chyam bra nga ai a majaw hkra machyi ai lam gaw masha shagu hta kawsi hpang gara ai lam hpang wa nga ai lam re;” nga nna Wa Sarabyin Francis a mungga hta tsun shadum da nga ai.

“Bungli galaw nmai mat ai a majaw hku hku kaba hkrum hpang wa nga ai hpe anhte mu hpang wa saga ai. Mayak manghkang law law a majaw aten shagu man man galaw nga ai bungli ni nmai galaw sha mat masai. De a majaw hpang de hkrum hkra wa na mayak manghkang hpe mung anhte ni mu hpang wa saga ai re. Dai gaw ya hpang magang nga sai re. Coronavirus ana zingli chyam bra nga ai a majaw kun dinghku hta ra kadawn nga ai lam ni hpe ladat shaw tam bram nga ai ni a matu akyu hpyi ya nga ga.” nga nna Wa Sarabyin matu n gun jaw da nga ai.

Yawhan a Kabu gara shiga (7:40-53) hta Madu Yesu gaw Mesiah, hkyela Madu re ngu ai hpe shawa masha ni hta Myit shai hkat ai mabying lam hpe la kap nna myit sum ru let shadum jahprang da nga ai. Chyum Mungga hta “shanhte ni tinang dum nta de nhtang wa ma ai. Masha hkum shagu gaw tinang hkam la ai hta hkawm sa ma ai.” nga nna rawng nga ai. Wuhpung mi gaw Yesu hpe madat mara ma ai; Shi hpe Tsawra ma ai; shi a hpang hkan nang ma ai. Wuhpung mi gaw hpung woi ni rai ma ai rai nna, shanhte ni gaw shawng na wu hpung ni hpe ndawng nyawt ma ai. Yu kaji ma ai. Shanhte gaw Yesu hpe Tara n hkan ai wa ngu tsun let, shi hpe nhkap la ma ai.

“Karai kasang a chyoi pra san seng ai Myu sha ni gaw Madu yesu hpe kam sham ma ai. shi a hpang hkan ma ai. Hpa majaw shi a hpang hkan ai ngu mung n tsun dan lu ma ai. Raitim madu yesu a hpang hkan nang ma ai. Madu Yesu shanhte ni a masin salum hta shang ningngai nga ai rai nga ai. shanhte ni pu ba ai lam n nga ma ai. Karai kasang a Myusha ni gaw chyeju kaba nga ma ai.anhte ni zawn mara lu ai ni re ngu hkam la ma ai raitim chyoi pra ai wenyi lam woi ai hta hkan nang let hkye hkrang la ai lam hta hkawm sa nga ma ai.” nga nna Wa Sarabyin gaw shawng na wu hpung ni hte seng nna sang lang da ai.

Matut nna Wa Sarabyin gaw “nlaw la ai wuhpung ni rai nga ai Tara Sara kaba ni gaw shawa masha ni kawn shanhte hkum shanhte ni garan ginhka la nnaYesu hpe nhkap la ma ai.” nga ginhka dan da nga ai.

Hpa majaw Dai zawn garan ginhka mat ma a ta?

Wa Sarabyin gaw “hpung woi ni shanhte hkum shanhte mung karai kasang a myusha ni rai nga ai shawa wuhpung hta lawm nga ai ngu ai hpe malap mat ma ai majaw re. dai gaw shanhte hkum shanhte galai shai ai lam nnga ai; shanhte ni gaw ana power arawng kaba ai laksan masha ni re ngu hkam la nna, shanhte myit ra ai hta sha shanang hkawm sa ai majaw re.” nga sang lang dan da nga ai.

Wa Sarabyin gaw Corona Ana zingli tsing yam kaba a majaw Nawku hpung hta wuhpung madang myu lahkawng garan wa ai lam hpe mung sawk sagawn sang lang da ai.

“Masha nkau ni gaw Jau ni hte Sasana majan je hpung ni rai nga ai (religious hpung) ni gaw matsan jam jau hkrum nga ai ni hpe yu lakawn na matu tinang a buga de nhtang wa mu ga nga myit ma ai. bai masha nkau ni gaw Jau ni hte Sasana majan je hpung ni gaw ya na dai Ana zingli ni hpe myit tsang ai lam nna ai sha Sacramentu chyeju kumla ni hpe jaw shakut nga ra ai nga myit nga ma ai.” wa sarabyin gaw ndai zawn nawku hpung kata hpung masha ni myit la, hkam la ai nbung ai lam yan ni hpe myit aru let anhte hpe shadum n gun jaw nga ai. “nkau ni gaw tinang hkum tsaw ai madang hta nga ai majaw lawu tsang hta nga ai masha ni hpe garum ai hta shanhte ni a lata ni hpe nsan nseng ai lam ni nhkra u ga sha myit madung da nga ma ai. Lama na anhte ni matsan jam jau hkrum nga ai ni kaw sa daw jau na matu n gun atsam nnga ai rai jang anhte hta Lama ma gaw shut taw sai” nga nna Wa Sarabyin tsun shadum da nga ai.

Wa Sarabyin shi a Mungga ginchyum dat ai hta Timothy laika lahkawng 1:5 hta San Paulu Timothy hpe shadum n gun jaw da ai ga “na n woi dwi hte na n Nu hpe myit dum nga u” nga ai n gun jaw ga hte jahtum da ai.

Ndai shiga hpe vatican shiga dap kawn March 28 ya shani ndau da ai hpe na la ai ni mung Wa Sarabyin a yaw shada ai hta sumru let hkan sa lu mu ga yaw shada let RVA kachin service kawn shalai ndau dat ga ai.

Soruce; Vatican News