Karai Kasang A Chyeju Kumhpa Rai Nga Ai Simsa Lam Hpe N gawn Nsawn Lahpawt Kau Ai Lam N Galaw ga Wa Sarabyim Tsun

Karai kasang a chyeju kumhpa rai nga ai simsa lam hpe n gawn nsawn lahpawt kau ai lam n galaw ga, nga nna, “Peace with no borders" ngu ai ga baw the Spain mungdan Madrid mare daju hta galaw nga ai 33 lang ngu na simsa lam a matu akyu jawm hpyi ai hpawng hta shang lawm nga ai Madrid saradaw kaba Cardinal Carlos Osoro Sierra the hpawng hta lawm nga ai ni yawng hpang de shagun jaw dat ai mungga laika hta wa sarabyin Francis tsun dat nga ai. Ndai simsa lam a matu akyu jawm hpyi ai shamu shamawt uhpung hpe lai wa sai shaning 33 ning hta “Community of Sant’Egidio" ngu ai uhpung kaw nna gaw de hpang wa ai the dai ning na akyu jawm hpyi ai hpawng hpe Spain mungdan Madrid mare daju the September 15 ya kaw nna 17 ya du hkra galaw nga ai rai nga ai.

Wa sarabyin shagun jaw dat ai mungga laika hta, “ya na zawn simsa lam a matu akyu hpyi shamu shamawt ai lam hpe  shaning shagu nhprai ai sha matut manoi galaw lu nga ai lam gaw kabu myit pyaw hpa nan rai nga ai, lai wa sai shaning 30  ning daram hta Uropa dan hpe myit ga garan shangun ai the tsinyam lam ni law law shabyin ya lai wa ai Barlin shakum madin hpe run kau lu lai wa ai mabyin a majaw myit mada shara nnan the simsa lam hpe lu la lai wa ai. Karai kasang a kashu kasha ni law law a akyu jawm hpyi ai hku nna shang lawm lai wa ma ai a marang e mung ndai Barlin shakum madin hpe run kau lu lai wa ma ai rai nga ai. Dai re majaw simsa lam a matu akyu hpyi na galoi mung ra ahkyak ai, ndai tsaban nnan a shaning 20 ning laman, shakum madin ni hpe chyu gaw gap ai lam ni galaw nna Karai kasang a chyeju kumhpa rai nga ai simsa lam hpe n gawn nsawn lahpawt kau ai lam ni galaw nga ma ai, masha ni hpe myit ga garan jahka lam ni galaw nna simsa lam hpe la pat ai lam gaw angawt ai lam nan rai nga ai, myit ga garan shangun ai shakum madin gaw gap na hta, shada tsawra hkungga lakawn hkat na lam hpe madaw she anhte a mungkan ra nga ai, shada da matut mahkai lu hkra, hkrum zup lu hkra, magam bungli rau ta gindun jawm galaw lu hkra chying hka ni hpe hpaw ya na madaw she anhte a mungkan ra nga ai, shaloi she nbung npre ai lam ni hpe shada hkungga manu shadan hkat let, tinang nang a lit magam ni hpe gun hpai la rai nna simsa ai masa the shada jawm hpawng nga pra lu na rai nga ai, simsa lam ngu ai tha lamu ga mungdan jarit ngu ai nnga ai majaw nsen langai, myit masin langai hte simsa lam a matu myit hpawm nga ga, simsa lam hpe ra shawng nga ai gaw myit masin salum rai nga ai majaw hpu nau tsawra myit hpe gaw gap nga ga,” nga nna wa sarabyin tsun dat nga ai lam Vatican shaiga dap kaw nna shana dat nga ai.   

Source- Vatican News