Kanu Ni Yawng A Matu Wa Sarabyin Francis Akyu Hpyi Ya

September 7, bat masum ya shani, kanu ni yawng, grau nna lam amyu myu a majaw jam jau nga ai kashu kasha ni a kanu ni a matu, Wa Sarabyin Francis akyu hpyi ya dat nga ai.
Nawku Hpung gaw Kanu Nu Maria a shangai nhtoi, September 8 ya shani na nawku daw jau magam lamang ni a matu tau nau hkyen lajang nga ai rai nga ai.
Maria gaw chyeju hpring ai kasha langai zawn Karai kasang a tsaw ra let yu lakawn ai hkrum ai mahkrum madup hpe hkam la lu ai.
"Kanu ni yawng hte nihtep nga nga nngai hpe tsun dan mayu ai, grau nna ruyak shoichyum hkrum hkra taw nga ai ma ni a kanu ni: mani chyi makaw nga ai ni, kau da hkrum ai ni, hkyukhtawng kaw rawng nga ai ni hte nihtep nga nga nngai" nga nna Wa Sarabyin tsun shapraw da ai.
Kanu Nu Maria gaw kanu ni yawng hpe shalan shabran ya nga u ga, jam jau jam hkau hkrum hkra nga ai ma ni a majaw yuyak shoichyum hkrum nga ai kanu ni yawng hpe shalan shabran ya nga u ga, ngu nna mung Wa Sarabyin Francis, Nu Maria kaw akyu hpyi htinglu htinglai da ya nga ai.
September 8 ya shani gaw Madu Yesu a Kanu, Nu Maria a shangai nhtoi rai nga ai.

By Fr. Patrick Gawmaw Hkawng Yae
#vaticannews
#rvakachinservice
https://www.vaticannews.va/en/pope/news/2022-09/pope-francis-appeal-moth...