Kaji Ten Kaw Na Nu Hpe Grai Tsawra Ai

Nu Maria hpe kaji ai kaw na Nu hpe  grai tsawra ai, Madu Yesu hpe mung grai tsawra ai. Ngai gaw kaji ai ten kaw na Nu Maria hpe grai tsawra nna chye nga ai kasha re. Ngai hta kaji ai kaw nna ana ahkya ni grai law lu ai. Grau nna asak ( 45 ) ning re ai shaloi sinda shan Cancer ana lu mat wa ai. Rai ti mung Nu Maria kaw akyu hpyi ai, Chyoipra Hkum kaw akayu hpyi ai. Hpang e gaw ngai na ana ahkya ni dat kakang tsi tsi ra ai raitim mungding tsi hte hpun ru tsi ni hpe lu nna nga ai. Sarawun ni gaw ngai hpe shata ( 6 ) hkam na nga nna tsun ai. Raitim Karai Kasang a chyeju hte asak ngu ai Karai Kasang sha madu ngu ai hpe grau chye na la hkra ngai hpe ya du hkra tawn da ai. Daining gaw ngai ga lajang tsi tsi hkam la ai kaw nna ( 24 ) ning asak bai galu hkra nga lu sai.

Dai re majaw ngai gaw asak ( 50 - 60 ) du hkra gaw chyeju dum ai hku nna Nyaung Lay Byin Nu Maria poi de sa nna akyu hpyi na ngu ga sadi jaw ai. Asak 50 - 60 ning du hkra gaw dai kaw sa du akyu hpyi la lu sai. Dai hpang e gaw Nu Maria gara kaw nga na kun, ngai asak grai kaba mat jang gaw buga kaw na Anu hte rau nga na, naw mai hkawm ai ten hta gaw sumtsan de na akyu hpyi ginra ni de sa na ngu nna myit hta galoi mung rawng ai. February shata hta rai jang asak ( 60 - 70 ) ning du hkra Myitkyina Myint Sone na Tanghpre Nu Maria kaw sa nna akyu hpyi na, ap nawng na, kade yak timung shakut na ngai hte rau lu woi mai ai ni hpe mung woi lakawn na ngu nna myit dawdan da ai, Octorber shata hta gaw Chan Thar Kone Nu Maria kaw sa nna akyu hpyi na ngu myit dawdan da ai raitim Covid ana a majaw ( 5 ) sa ai hpang n lu sa mat ai. 

Dai ning gaw mung masa n pyaw ai mayak mang hkang lam ni grai law ai majaw n lu sana re ngu grai myit n pyaw ai, myit dat shagu hkrap mayu wa ai. Ngai she nu hpe tsawra ai majaw sa na ngu ga sadi jaw da ai re, ngai lu hkra sa na ngu nna nbungli shabrai ni laja ai raitim lam shagu hta Madu Yesu hte rau hkawm sa lu ai. Anu ngai hpe shaga taw nga ai ngu nbungli hte lung wa ai shaloi n myit mada da ai sha Wa Saradaw hte rau Bat 5 ya shani de kaw nna Tanghpre Nu Maria kaw du wa lu ai.

Ndai kaw du ai shaloi gaw grai pyaw ai, Nu Maria gaw shi hte rau htep htep rai nna Rosary hti na hpe ra nna rai na re. N lu sa jang gaw ngai wa makam masham n nga ai I, gara hku I ngu myit la nna lu sa hkra shakut ai. Manmaw na masha ni mung sa mayu ai masha grai law ai. Htaning na aten hta gaw anhte a mung masa lam ni mung ngwi pyaw wa rai nna tara rap ra ai mungdaw mungdan hta e sak hkrung hkawm sa rai nna Nu Maria hpe grau nna tsawra hkungga lu ai chyeju ningsang, htinglu htinglai na matu garum hpyi lu ai ahkaw ahkang ni bai lu la u ga ngai gaw ngai 8 lang na Tanghpre Nu Maria kaw du ai re. Ya gaw ngai grai pyaw ai hte bai yu wa na, htaning na matu sha akyu hpyi nna ala taw nga na re, htaning mung ndai Tanghpre kyu hpyi ginra ndai kaw bai lu du hkra, Manmaw masha ni, sa mayu ai ni yawng hpe bai lu lakawn hkra shakut na.  

Add new comment

3 + 3 =