Kaji Kawoi Ni Hte Asak Kung Dinggai Dingla Ni A Poi Nhtoi Hpe Mungkan Madang Masat Da Ya Ai Lam

  Dai ning (2021) shaning kaw nna shaning shagu July shata na mali (4) ngu na laban bat hta Kaji Kawoi ni hte asak kung dinggai dingla ni a masat poi galaw na matu Wa Sarabyin Francis kawn Pranwan Ladaw mali (4) ngu na laban shani na “Madu A Lamu Kasa Akyu Hpyi” ngut ai hpang masat shagrin da ya ai lam Vatican Shiga Dap kaw nna January (31) ya shani ndau da ma ai.

  Ndai poi nhtoi gaw Madu Yesu a kaji kawoi San Joachim hte San Anne a poi nhtoi hte grai ni htep dik ai nhtoi mung ang ai re majaw yaw shada let masat da ai rai nga ai.

  Ma Yesu hpe Nawku Htingnu hta sa ap ai hta poi nhtoi hta asak kaba sai Simeon hte Anna gaw Ma Yesu hte hkrum lu ma ai rai nna, dai Ma Yesu gaw Messiah re ai hpe dum chye ma ai. Chyoi Pra ai Wenyi gaw daini na aten ni hta mung Karai Kasang a hpaji byan-ya hpe asak kung dinggai dingla ni hku nna asak kaji grau ai ni a ntsa yu bang ya nga ai.

  Asak kung sai ni a nsen gaw grai nan manu dan ai. Hpa majaw nga yang dai nsen gaw Karai Kasang hpe shakawng shagrau ai hte shinggyim masha ni a ru pawt madung hpe mung makawp maga hting hkang da ya ai re ngu Wa Sarabyin Francis shang lang da ai.

 Asak kaba sai ni kaji kawoi ni gaw sak naw ram shi ai ni a matu shinggyim prat bang shagu a mahkrum madup ni hpe matut mahkai ya nga ai.

  Asak kung kaji kawoi ni hpe n mai malap da ai. Shinggyim masha law malawng gaw asak kaba sai kaji kawoi ni hpe malap dap chye ma ai. Ndai asak kaba sai kaji kawoi ni gaw sam ram ramma ni a matu Karai Kasang kaw na lu la ai chyeju kumhpa re ai hpe myit dum ra ga ai.   Kaji kawoi ni hte kashu ni lapran hta shada chye na hkat na gaw grai nan ahkyak ai. Hpa majaw nga yang, Myihtoi Joel tsun ai hte maren, kaji kawoi ni gaw shanhte a kashu kasha ni a yup mang shingran bandung hpe mu chye ya ai hte shaman ya lu ai hte lam woi ya lu ai. Kashu ramma ni gaw kaji kawoi ni a myithtoi ga, shaman ga, hte lam matsun ya ai a marang e shawng lam bandung de du dep lu na rai nga ai.

  Amoris Laetitia Kun Dinghku masha shaning a shawng ngai ai apu asi a lam “Prefect of the Dicastery for Laity, Family and Life” a hpa-awn Cardinal Kevin Farrell kaw ndau da ai shi laika hta Amoris Laetitia Kun Dinghku masha shaning a shawng ngai ai apu asi gaw Nawku Hpung ting a shawng lam a matu chyeju kumhpa re ngu ka da ai lam mung Vatican kaw nna ndau da ma ai.

  Wa Sarabyin a encyclical Fratelli tutti, hta mung “kadai rai tim tinang hkum tinang marai langai sha hkye la n lu ai” ngu tsun da ai. Kadai rai tim tinang hkum a matu sha sak hkrung lu ai n rai ngu tsun ai rai nga ai. Anhte a wenyi sutgan ni hte shinggyim sutgan ni hpe shinggyim prat bang shagu de shalai jahkrat ya ra ai.

  2021 shaning na sak kung kaji kawoi ni a poi hpe July 25 shani ang na rai nna, dai poi masat a shawng ningnan Misa Hkungga hpe San Peter Nawku Htingnu hta nawng jau na re lam, aten ni htep wa ai shaloi kalang bai shagrin ndau ya na re lam Vatican Shiga Dap kaw nna ndau da ma ai.

Source; Vatican News