Kahtawlik Sasana Du Shang Ai ( 100 ) Ning Hpring Jaw Jabali Poi Galaw

Jubilee poi hta sa lawm ai Wa Saradaw, Wa jau, Mama ni

Manmaw Saradaw Sasana, Sin Lum Jau ginwang de Kahtawlik Sasana du shang ai Jaw Prat (100) ning hpring ( 1923-2023) chyeju dum Jubali poi hte 1998 ning hta Sin Lum kaw Jau aya hkam la sai Wa Jau Michael Lazum Lung Wa hte Wa Jau Patrick Jangmaw Tu Shan yan a Jau prat (25) ning hpring chyeju dum Jubali poi hpe (13.4.2023) ya shani  Sin Lum Bum na Chyoi Pra Ai Rosari Hkawhkam Jan Nawku jawng wang hta kabu gara galaw la lu sai. 

Ndai Poi hta Manmaw Saradaw Sasana lit hkam Sagu rem wa,Wa Saradaw Raymond Sumlut Gam,Wa Saradaw Philip Lasap Za Hawng (hkringsa), Wa Saradaw Francis Daw Tang (hkringsa) hte Wa Jau ni marai (20) jan, Wuhpung Shagu na Mama ni, Brother ni, Shara shagu na Tara hkaw Sara/num ni hte Nawku hpung masha marai (1000) daram sa du shanglawm sai rai nga ai. Sin Lum Bum hta Maigan Mungdan na Columban Sasana  jau ni shawng makam masham nli hpe gat da hpang ya sai lam labau hta chye lu nga ai. 

Sin Lum Bum hta Kahtawlik sasana du shang wa ai labau kadun hte seng nna labau sawk sagawn ka shapraw da ai Sara Columban Sabaw La Tawng tsun hkai dan ai hte maren chye lu ai gaw; 

Maigan mungdan de na du sa wa ai Columban Sasana jau hpung hta ap nawng magam gun  ai Wa jau Rillstone gaw  Sin Lum buga hta shawng nnan du sa wa nna Kahtawlik sasana hpe nli tum gat hkai hpang ya sai rai nga ai. Wa jau gaw  sumla dem grai myit lawm ai wa re,  buga masha ni a dum nta hkan sa chyai ai, sa jahta ai, shanhte hpe sumla dem ya ai, dai sumla ni hpe sumpan grang da nna sleight film hte bai madun dan rai nna zinlum kahkyin la ai. Mare masha ni mung sleiht film madun dan ai shaloi tinang a sumla lawm taw jang grai kabu, grai pyaw ma ai lam chye lu ai. Manmaw Saradaw Sasana hta langai sha nga ai nlung hte gaw gap da ai nawku jawng hpe mung Sin Lum Bum Wa jau Rillstone gaw gap da ya sai rai nga ai.

Sin Lum Bum gaw asuya maga hku nna yu dat jang mung rung dung ai shara rai nga ai hte asuya lahta tsang jawng nga ai shara rai nga ai. Dai majaw ndai Sin Lum buga kaw nna asuya mu gun ai du gyi salang ni, Karai a magam gun ai ni law law mung paw pru ai. Dai hta na daini sa du lawm ai Manmaw Saradaw ginwang lit hkam Wa Saradaw Raymond Sumlut Gam mung ndai Sin Lum asuya jawng hta hpaji sharin jawng lung lai wa sai, jawng lung let asuya boarder nga ai shaloi N-gun shaja sakramentu hpe hkam la lu ai re lam Jubali poi shani sak se tsun dan sai rai nga ai.

Wa Jau Paquet gaw (1924) ning Mandalay Myo kaba de du sa ai ten, Wa Jau Giholdes hte rau nga nna (1927 ) ning hta Sin Lum Jau Ginwang masat jat dat ya sai hte maren, shawng ningnan na Sin Lum Jawng dung Jau tai wa sai. Sin Lum kaba ( lawu kahtawng Manmaw Kawng ) ngu ai shara kaw kawa hte galaw ai Nawku Jawng hpe gap hpang wa nna, laika sharin jawng mung bai matut gap ya let, hpaji lam a matu shalat shapan ya sai. Sasana ningnan du shang wa ai ten, dingbai dingna amyu myu yak hkak tim, kaning re ai du magam hpe mung hkrit agam ai n nga, n tara ai hpe gwi gwi tsun lu ai atsam nga ai.

(1939) ning Jinghpaw buga Kahtawlik Sasana hpe Francis Jau ni a lata kaw na, Columban Jau ni bai lit galai woi awn wa sai hpang, (1979- 2023) ning du hkra, buga Jau ni marai (6) Nmawk Jau Ginwang Up ni Sin Lum Jau Ginwang hpe woi awn ai, ya gaw Wa Jau Dr. Stephen Nawng Lat kawn, ( 100) ning Jaw Jubali a matu Sin Lum hpung masha ni hpe zinlum let, shakut ya sai. 

Wa Jau Rillstone gap da ai,Nawku Jawng hpe bai gram ai. Nu maria Lungpu hpe grau tsawm ai hku gram ai. bai nna Yesu si hkam ai Wudang bum kaw Yesu a hkrang Sumla mung shakap da sai, dai sha n- ga (Open Stage) yu ngwi pinra hpe woi awn gaw gap da sai. Wa Jau gaw mare buga galu Kaba rawt jat wa na matu (Solar) wan lu hkra lajang da ya sai. Nu Maria hpe hpung masha ni grau kamhpa lu u ga matu Legion Of Mary hpung hpe hpaw ninghtan da lu sai.

Sin Lum mare hta hpung masha htinggaw ( 20 ) daram nga ai rai nna, jau ginwang ting rai yang she hpung masha htinggaw ( 58 ) sha nga ai jau ginwang rai nga ai. 

 

Shiga - Julia Ja Ing 

 

Add new comment

8 + 10 =