Kahkyin Gumdin Lam Hte Makam Masham Lam Hta Ngang Kang Lam Lu Hkra Shakut Na Matu Asia Dan Nawku Hpung Ni Hpe Wa Sarabyin N-Gun Jaw

Asia dan Nawku Hpung hku nna myit hkrum gahkyin lam hte makam masham lam hta kang kang ngang kang lam nga hkra shakut galaw ga, nga nna Wa Sarabyin Francis shadut n gun jaw lam galaw dat nga ai. Jan 15 kaw nna 18 ya shani du hkra Thailand mungdan hta galaw nga ai Asia dan saradaw ni a rap daw, makam masham hte seng ai Commission zup hpawng de shagun jaw dat ai Wa Sarabyin laika hta lahta na zawn tsun shadut dat ai lam rai nga ai.

Wa Sarabyin tsun ai hta, “Nbung ai makm masham, htung hkring lai htung masa ni law law nga nga ai Asia dan hta, myit hkrum gahkyin gum din lam, Kahtawlik makam masham ngang kang nga hkra shakut galaw lam, ngu ai magam bungli ni a matu lit nga ai Jau saradaw ni hku nna, shada mahkri shawn lam galaw nna tinang a magam bungli awng dang wa hkra n gun dat shakut galaw nga ga, dai ni na prat aten masa hta hkrum kadum nga ai yak hkak mang hkang lam ni a lapran kabu gara ai shiga hpe sake hkam sak hkrung hkawm sa nga lu hkra kaning re ai lai ladat nnan ni lang lu mai na ngu ai lam ni hpe sawk sagawn la ra na rai ga ai.

 Makam masham hte seng ai Nawku Hpung ginjaw magam dap kaw nna mung, Asia dan Saradaw ni wuhpung rap daw ni hku nna tinang a lit magam hpe masan sa ai masa gun hpai lu hkra garum madi shadaw ya ai lam ni mung galaw ya nga ai re” nga nna Wa Sarabyin tsun shadut lam galaw dat nga ai, nga nna Vatican shiga dap kaw nna shana dat nga ai.

Source : Vatican News