Kachyihtu Jau Aseng Hta Hpung Woi Tara Hkaw Sara/num Ni A Myit Sumru Akyu Hpyi Hpawng Galaw

Kahtawlik Sasana, Myitkyina Saradaw Ginwang, Kachyihtu Jau Aseng hta Tara hkaw Sara/num ni a 2020 shaning na myit sumru akyu hpyi hpawng (wutsawk) hpe September 25 – 29 lapran galaw la lu sai lam chye lu ai.

September 25 ya shani manam du hpang ma ai rai nna, myit sumru akyu hpyi hpawng hpe September 26 hte 27 lahkawng ya tup, Htingnan Jau Ginwang, ginwang up, Wa Jau Paul NSau Gum Dan kaw nna woi awn la ya sai.

Karai kasang shinggyim masha ni hpe shaga la nna lata la ai gaw shi a ja Mungdan hpe shinggyim masha ni yawng hkam la lu na matu rai nga ai lam Ga Shaka Dingsa hte Ga Shaka Ningnan chyum laika hta na mungga ni hpe lakap nna myit sumru woi awn lai wa sai lam chye lu ai.

Myit sumru akyu hpyi hpawng ngut ai hpang September 28 hte 29 lahkawng ya tup, jau ginwang hkumra zup hpawng hpe Kachyihtu Jau Ginwang Up, Wa Jau John Nhpawt Seng Lat kaw nna woi awn let zuphpawng hpawng la lu sai.

“Kachyihtu ginra buga ngu dat ai hte Kahtawlik Nawku Hpung masha ni law malawng nga ai shara re ai hpe law malawng chye ma ai. Dai majaw Tara Hkaw Sara/num ni e, Kachyihtu gaw anhte a buga anhte a dum nta re ai hpe myit dum let buga masha ni hpe Karai Kasang myit ra ai hte maren ap nawng woi awn nga ga”,

ngu ginwang up jau kaw nna n gun jaw da ai lam chye lu ai.

Myit sumru akyu hpyi hpawng hte hkumra zuphpawng hta Tara hkaw sara (19) hte rau Hpungtau ni, ginwang mung bawng salang ni, Num hpung, La hpung, Ram hpung ni kaw nna dak kasa ni shang lawm ma ai rai nna, yawng pawng dakkasa 70 daram shanglawm lu sai lam chye lu ai.

Sasana jawng hte seng nna mung bawngban ma ai lam chye lu ai. Kachyihtu jau ginwang hta sasana jawng masum nga ai: Kachyihtu mare  na  lapran tsang jawng- jawng Sara/num 13, Ura kahtawng na lawu tsang jawng – jawng Sara/num 5, hte Nbyen Mare na San John lawu tsang- jawng Sara/num 7, ni rai ma ai lam chye lu ai.

Nbyen mare na San John lawu tsang jawng hta magam gun Sara/num marai 7 nga ai rai tim, Saradaw Ginwang Ginjaw malai hpaji lam hta madi shada ya nga ai “Diocesan Education Commission” Saradaw Ginwang Hpaji Dap kaw nna marai manga hpe sha garum ya nga ai majaw, ngam ai Sara/num marai 2 hpe Kachyihtu Jau Ginwang kaw nna ladat shaw garum sa wa na matu bawngban da ma ai lam chye lu ai.

Tara hkaw Sara/num ni hte Nawku hpung masha ni yawng a malai ndai myit sumru kyu hpyi hpawng hte hkumra zuphpawng bying tai wa hkra lam woi la ya sai, ginwang up Jau John Seng Lat hte myit sumru kyu hpyi hpawng hpe woi awn la ya sai, Htingnan Ginwang up, Jau Paul N Sau Gum Dan yan hpe chye ju dum ai lam; bai ndai lamang hpang ai kaw nna ngut kye ai ten du hkra lam amyu myu hku garum ya sai ginwang ramma ni hte chyeju madu ni yawng hpe chyeju dum ai lam shiga shana dat nga ai.

Fr.Patrick, Thomas