Jinghpaw Mung Shara Law Law Hta Nu Maria A Shangai Nhtoi Poi Galaw

Missa sa lawm ai hpung masha ni hpe nga chyu jaw lu ai

 

September 08, ya shani ang ai ,Nu Maria A Shangai nhtoi poi hpe Jinghpaw Mung shara law law hta galaw ai hpe mu lu ai. Nu Maria a shangai nhtoi poi i hpe Hkamja Lam A Nu  Maria ( Velankanni ) poi nga nna Jinghpaw Mung kaw nga ai Kahtawlik nawku hpung masha ni grai manu shadan galaw taw ai rai nga ai.

Myitkyina St. Columban Cathedral hta mung Hkamja lam a Nu Maria, Nu Maria a shangai nhtoi poi hpe September 08, 2022 ya shana de hkying, 4 aten Novena shangut rosary hti akyu hpyi nna Wa Saradaw hte Wa Jau ni nawng ya ai Missa hkungga hte kabu gara galaw la lu sai.

Lai wa sai ten ni hta Nu Maria a shangai nhtoi poi hpe hpung masha ni law law hte wu wu di di rai Missa hkungga ngut ai hpang Nu Maria a hkrang bung sumla ni hpe hpai let jawng wang shinggrup rosary hti akyu hpyi ai lam ni galaw ai raitim ya aten mung masa n sim sa ai re majaw Missa hkungga ngut ai hpang Chyoipra Hkum shaman ai, Benediction hte shangut la lu sai.

Nu Maria a shangai nhtoi masat Birhtday Cake hpe mung Wa Saradaw Francis Daw Tang shaman nna gama garan sha lu sai.

Nu Maria gaw nga chyu dut ai wa kaw dan pru dan ai masat hku nna Missa hkungga sa lawm ai hpung masha ni yawng hpe nga chyu gam garan jaw ai.

Hkamja lam a Nu Maria ( Velankanni ) poi a matu Novena hpe nhtoi ( 11 ) ya tup galaw lai wa sai rai nga ai. Novena galaw ai ten hta hkum hkrang, myit masin ngwi pyaw hkam kaja na matu, Mungdan ngwi pyaw simsa wa na matu, machyi makaw ru yak jam jau hkrum sha nga ai ni a matu hte kaga ra ai akyu ara ni a matu akyu ara hpyi la lu sai. Novena aten hta hpung masha ni law law mung hkam kaja lam a matu, mungdan ngwi pyaw simsa wa na matu,  n nga mat sai wenyi ni a matu, asak kaba sai gumgai dingla ni a matu, magam bungli awng dang na matu nga nna kam sham ai myit kaba hte akyu hpyi shang lawm ai, alu jaw missa hpyi ai lam ni galaw ai hpe mu mada lu ai.

 

Shiga - Julia Ja Ing

Add new comment

3 + 2 =