Jinghpaw Mung Hte Sammung Dingdung Daw Hta Byin Nga Ai Manghkang Lam Ni Hpe England Hte Europe Mungdan Ni De Tang Madun Dan Ai Lam Galaw

UK hte Europe Mungdan ni de sa du ai wuhpung ni / Photo : Fr.Paul Awng Dang

Ya ten Jinghpaw Mung hte Sam Mung Dingdung daw ni hta majan a majaw hpyen yen tsin yam jam jau hkrum sha taw nga ai mabyin masa ni hte kaga shingyim ahkaw ahkang tawt lai ai lam ni hpe Mungdan kaba rai nga ai England hte Europe Mungdan ni de  wa tsun jahpra dan lu sai lam chye lu ai.

Ndai hkrum lam hta Christian Solidarity Worldwide (CSW) kaw na woi awn let Sam Myusha SSPP kaw na marai langai, PNLA  Amyu shayi langai, KWAT kaw na marai langai, Humanity Institute kaw na marai langai, Rev.Dr.Hkalam Samson hte Wajau Paul Lahpai Awng Dang ni lawm ai lam chye lu ai.

England Mungdan kaw du ai shaloi England Mungdan na Members of Parliament ni marai (16) hte hkrum shaga lu ai, bai nna Bishop Conference of England and Wales kaw na Human Trafficking hte seng ai Wa Saradaw kaba hte Foreign Affairs Minister ndai ni hte hkrum shaga da lu ai lam Wajau Paul Lahpai Awng Dang tsun dan ai kaw na chye lu ai.

Wajau Paul Lahpai Awng Dang matut tsun dan ai hta “ November 20 ya shani gaw Europe Mungdan de bai du ai shaloi International Human Right Law (70) ning hpring masat nhtoi galaw ai Europe Parliament kaw shang lawm hkrum shaga ai lam, Ndai zawn sa hkrum shaga ai a yaw shada lam madung gaw Myanmar Mung kata na Rakhine Mungdaw hta byin ai mang hkang hpe Mungkan Mungdan ni chye ai rai tim Jinghpaw Mung hte Sam Mung dingdung daw ni hta jamjau hkrum nga ai hpyen yen tsin yam , shinggyim ahkaw ahkang tawt lai hkrum ai lam ni hpe Mungkan gaw malap kau ya ai, nchye ai daram byin wa ai majaw dai lam ni hpe chye na , chye madat ya na matu sa tsun dan ai re lam, Myanmar Mungdan hta byin nga ai mang hkang hpe Myanmar Mung asuya hte sha shaga taw nga yang masan nsa ai lam ni law law nga wa ai majaw Mungkan kaw nna Myanmar Mung asuya hpe tsun shadut ya na matu yaw shada nna sa hkrum shaga ai re “ nga ai.

N-dai lam hte seng nna grau hkum tsup ai hku chye lu na matu Wajau Paul Lahpai Awng Dang hte hkrum shaga da ai lam hpe kade nna yang madat la lu na ga ai.

 

Julia Ing

Add new comment

7 + 8 =