Jinghpaw Mung Hta Magam Gun Lai Wa Ai Columban Jau Kaba Lahkawng N-nga Mat

Lai sai ten shaning law law na hkra, Jinghpaw Mungdaw, Myitkyina hte Manmaw Sasana Ginwang ni hta magam gun lai wa sai Jinghpaw Wunpawng Myu sha ni a chye ju madu, Columban Sasana wuhpung kaw na Jau kaba lahkawng ndai 2019 October shata laman Madu Yesu kaw wun doi mat wa sai lam chye lu ga ai.

Myanmar Mungdan hta RVA Radio Nsen Shapoi lu hkra galaw shakut lai wa nna, RVA hpe Jinghpaw ga hku shapoi lu hkra galaw garum ya lai wa sai Wa Jau Colm Murphy gaw 2019 October 20 ya, Laban shani Ireland Mungdan. Columban Jau ni nga ai shara hta, Madu Yesu kaw yup pyaw ban sa mat wa sai rai nna, lai sai ten Manmaw na San Columban lahta tsang jawng up magam gun hpai lai wa sai, Wa Jau David Wall mung ndai October shata 25, 2019 ya shani Ireland Mungdan na Columban Jau ni a ginjaw Dalgan Park kaw Madu Yesu hta wun doi mat wa sai rai nga ai.

Wa Jau Murphy a moi mang makoi mayang lamang hpe 2019 October 23  ya shani galaw lai wa sai rai nna Wa Jau David Wall a hkum tsawp moi mang hpe October shata 29 ya jahpawt hkying 11:00 am ten akyu hpyi lup makoi mayang na re lam chye lu ai.

Anhte Jinghpaw mung  masha ni a chyeju madu rai nga ai Wa Jau Murphy a matu October 23 ya jahpawt  hte Wajau David Wall a matu October shata 26 ya jahpawt St.Columban Cathedral,Aungnan, Myitkyina kaw Wa Saradaw Francis Daw Tang hte Wa Jau ni, hpung masha ni Laksan myit dum Missa Hkungga nawng akyu hpyi ya ai lamang galaw lai wa sai rai nga ai.

Wa Jau David Wall gaw Jinghpaw mung kaw nna, wa mat ai Columban Jau ni hta na hpang jahtum ngam ai Jau mung rai nga ai. San Columban Lahta Tsang Jawng up galaw nga ai ten hta jawng zing kau ya ai hpang Bawda up bai galaw nga yang, 1966 ning hta Myen asuya kawn maigan masha Sasana galaw nga ai ni yawng  hpe wa kau shangun ai majaw bai wa mat ai rai nga ai.

Wajau Colm Murphy gaw Myen mung de 1958 ning nshung ta ten  hta du wa nna, Man Maw San Columban Lahta tsang jawng hta shawng nnan magam gun lai wa ai. Jinghpaw munghta (8) ning daram magam gun lai wa sai rai nna Asuya kawn matut nga na matu ahkaw ahkang Visa  n jaw mat ai majaw bai wa ra mat nu ai. Shi wa mat ai hpang raitim, Wajau Murphy gaw Wa Saradaw John Howe, Wa Saradaw Paul Zinghtung Grawng ni hte galoi mung matut mahkai ai lam galaw nna Jinghpaw mung sasana a matu lam amyu mayu galaw shakut lai wa sai rai nga ai.

Bai nna, Jinghpaw mung daw hta shanu nga ai Wun Pawng sha ni hte Wa Jau Murphy a lapran myit dun tsawra hkat ai Wa Jau Murphy a tsawra myit kaba gaw Radio Veritas Asia nsen shapoi dap hta Jinghpaw ga hte nsen shapoi lu na lam hpe byin pru shangun lai wa sai rai nga ai.

Thomas