Jau Ni A Hkum Shan Roi Rip Hkrum Ai Rai Yang, Tsun Shapraw Ai Lam Galaw Ga Nga Nna Philippines Mungdan Saradaw Tsun

Jau ni a hkum shan roi rip hkrum ai masha ni hku nna, zim rai ip nga ai lam ni n galaw ai sha tsun shapraw ai lam galaw ga nga nna, Philippines Mungdan Kahtawlik Saradaw rap daw kaw nna Saradaw kaba langai tsun dat nga ai.

Hpung masha ni hku nna teng man ai lam hpe tsun shapraw ra ai, tinang a Saradaw ni hku nna byin nga ai mabyin lam ni chye lu hkra tsun shana dan ra ai, nga nna lai wa sai February 19 ya shani Philippines Mungdan Kahtawlik Saradaw rap daw a ning tau ning baw Saradaw kaba Pablo Virgilio David tsun dat ai rai nga ai.

Saradaw kaba Pablo Virgilio David tsun ai hta, “Jau ni a roi rip hkrum ai mabyin mang hkang lam ni nga ai rai yang, Saradaw ni hpe a ding tawk tsun shana ai lam ni galaw na matu chyeju hte lit nli ga, teng man ai lam ni hpe tsun hpaw ai lam ni galaw na matu lit li dum ai aten ni nga chye ai, gaya ai majaw tsun shapraw ai lam ni n galaw ai rai yang nshawp nkap galaw hkrum ai masa byin hkrum chye ai,” nga nna Saradaw kaba tsun dat nga ai.

Nawku hpung kata ma kaji ni hpe makawp la lam hte seng nna Saradaw ni a zup hpawng hpe Vatican hta galaw na lajang nga ai aten ya na zawn Philippines Mungdan Saradaw tsun dat ai lam rai nga ai.

Ya Vatican hta galaw nga ai zup hpawng hta, Mungkan Mungdan shagu na Mungdan Saradaw rap daw a ningbaw saradaw ni yawng shawng lawm nga ma ai rai nga ai, nga nna Ucan shiga dap Internet laika man hta ka shana da nga ma ai.

Source : ucannews.com