Japan Mungdan Hta Wa Sarabyin A Ga Gale Tsun Ya Na Wa Gaw Wa Sarabyin A Jawngma Tai Lai Wa Yu Ai Jau Rai

 Wa sarabyin Francis Japan Mungdan du sa ai aten ga gale tsun ya na wa gaw Argentina Mungdan hta Wa Sarabyin a jawngma tai lai wa yu ai Jau re, nga nna Vatican shiga dap tsun shana lam galaw dat nga ai.

November 23, bat kru ya shani Wa Sarabyin Francis Japan Mungdan de du gawan sa wa na hte, Japan Mungdan hta shanu nga ai aten laman shi kaji ten kaw nna shaga ai ga rai nga ai Spain myu shaga hte sha tsun shaga lam galaw na re majaw, Japan Mungdan hta shanu nga nna sasana galaw nga ai Argentina myu sha Jesuit Jau Renzo De Luca kaw nna Japan ga hku ga tsun gale lam galaw ya na re nga ai.

Wa Sarabyin Francis Sarabyin garai n tai shi yang, Argentina Mungdan na Jesuit Dakkasu jawng up galaw nga ai aten, Jau Renzo De Luca gaw Wa Sarabyin a jawngma langai tai lai wa yu ai, de a hpang shi Japan Mungdan de Sasana galaw na matu shangun dat hkrum ai, ya aten hta Japan Mungdan Jesuit jau uhpung a ningbaw jau kaba magam lit gun hpai nga ai, moi kaw nna Wa Sarabyin hte grai hku hkau ai manang re, lai wa sai 6 ning laman Vatican hta Wa Sarabyin hte 2 lang sa hkrum shaga lai wa yu ai, dai zawn mu hkrum ai aten ni hta mung bungli masa nre ai sha grai hku hkau ai manang zawn aten la nna tsun shaga ai lam ni galaw lai wa yu ai  nga nna Vatican shiga dap hte hkrum shaga lam galaw ai aten Jau Renzo tsun dat nga ai.

Wa Sarabyin Japan Mungdan du sa wa ai shaloi ga gale tsun shaga lam galaw na lit hte seng nna Jau Renzo Vatican shiga dap de tsun ai hta gaw, “Wa Sarabyin tsun shaga wa na lam ni hte seng nna gade ram madang ga gale ya lam ni galaw ya ra wa na hpe gaw atsawm nchye ai, raitim mung ya na zawn galaw na ahkaw ahkang lu la ai hpe grai kabu arawng la nga nngai. Wa Sarabyin hku nna gaw shi kaji ten kaw nna shi shaga ai Spainish ga shaga na rai nga ai” nga nna tsun dat nga ai.

Kahtawlik Mungdan nre ai ndai Japan Mungdan na shiga dap kaba ni yawng mung Wa Sarabyin a hkrun lam hte seng nna grai myit lawm ai hte shiga san sagawn ai, shiga ka shabra ai, shiga shana ai lam ni galaw nga ma ai hpe mu mada nga ai majaw hpung masha ni yawng grai mau ai hte myit n gun mung grai lu nga ma ai.

 Kahtawlik Mungdan nre ai ndai zawn re ai Japan Mungda de du yang Wa Sarabyin hpa lam ni wa tsun wa na kun ngu ai lam ni hpe mung Japan Mungdan masha ni grai chye mayu nga ma ai. Simsa lam, nuclear wan bawm laknak dawm kau lu lam, nuclear tsam ning gun ni hpe simsa ai masa hte jai lang asung jashawn lam ngu ai ga baw ni hpe Wa sarabyin tsun shaga wa na re nga ai majaw mung grai myit katu ai myit ni hte Japan mungdan mung chying sha ni ala nga ma ai, ndai ga baw ni gaw Mungdan hta byin nga ai ahkyak ai gab aw ni mung rai nga ai, nga nna mung Jau Renzo De Luca shiga dap de tsun dat nga ai lam Vatican shiga dap kaw nna shana dat nga ai.        

Source : Vatican News