Japan Mungdan De Dai Ning 2019 Laman Sa Du Gawan Na Re Ai Lam Wa Sarabyin Tsun

2019 ning laman Japan Mungdan de Wa Sarabyin sa du gawan lam galaw na re lam, Panama Mungdan de sa wa nga yang n-bungli ntsa hta shiga dap na masha ni hpe tsun ndau ai lam Wa Sarabyin Francsi galaw dat nga ai.

January 23 ya shani Panama Mungdan de sa wa nga ai hkrun lam n-bungli ntsa hta shiga dap na shiga la ai masha ni hte hkrun shaga ai lam galaw ai aten, Wa Sarabyin hku nna Japan Mungdan de sa du gawan na masing nga ai kun? nga nna shiga la ai Japan amyu sha langai san ai ga san hpe, “Japan Mungdan de November shata hta sa du gawan lam galaw na re, shajin da manu,” nga nna Wa Sarabyin htai ya dat ai rai nga ai.

“Iraq Mungdan de chyawm gaw ya aloi sha sa du gawan na massing garai nnga shi ai, lani mi na nhtoi hta sa du gawan lu na re ngu myit mada nga ai, shim lam a matu tsang ra ai lam ni nga nga ai majaw ya garai hkum sa shi, nga nna shanhte tsun nga ma ai, ngai hku nna gaw kaja wa nan Iraq Mungdan de sa du gawan lam galaw mayu nga ai, mabyin masa shiga ni hpe dingrun madat maram lam galaw nga ai” nga nna mung Wa Sarabyin tsun dat nga ai.

De a hpang, lai wa sai December shata laman nnga mat wa sai Russia shiga dap langai kaw nna Alexei Bukalov ngu ai shiga la ai wa a matu akyu hpyi ya ai lam galaw lai wa ai, akyu hpyi lam galaw ai aten Wa Sarabyin myit grai hkam sha sam ai, ga ni pyi gari wa ai, nga ai.

Ya na zawn Wa Sarabyin a hkrun lam nbungli hta shiga dap na masha ni the hkrum shaga nna san ai lam ni hpe htai ya ai lam ni galaw ai gaw Wa Sarabyin a hkrun lam shagu dingru galaw nga ai lam rai nga ai. Shiga dap shagu na shiga la ai masha ni marai 70 daram galoi mung Wa Sarabyin a hkrun lam nbungli ntsa hta hkan nang nga ai rai nga ai. San ai lam ni hpe htai ya ngut ai hpang shada mani shaga hkat, sumla ni jawm dem re ai lam ni hpe mung Wa Sarabyin hkap la galaw ya ai rai nga ai, nga nna CNS Vatican shiga dap kaw nna shana dat nga ai.

Source:Catholicnews.com

Translated by :

Fr.Bernard Dashi Tang Ji