Japan Hte Korea Mungdan Lapran Myit Nhkrum Nra Lam Ni Hpe Shayawm Na Matu Japan Saradaw Ni Tsun Lajin Lam Galaw

August 19, 2019, Japan

Japan the Dingda Korea Mungdan lapran byin pru nga ai shada myit n hkrum nra dang rang hkat lam ni hpe shayawm kau lu hkra galaw na matu asuya ningbaw ni hpe Japan Mungdan Saradaw ni kaw nna tsun lajin lam galaw dat nga ai.

 Labau hta byin lai wa sai mabyin lam ni hpe grai ku let tsun shaga lam galaw nna, naw hparan la ra ai mang hkang lam ni hpe mung atsawm jawm shaga bawng ban nna mahtai tam la lam galaw ga, nga nna August shata 15 ya nhtoi hte ndau shapraw ai Saradaw ni a laika hta lahta na zawn tsun lajin lam galaw dat ai rai nga ai.

 “Japan Catholic Council for Justice and Peace” ngu ai Commission ningbaw Saradaw Taiji Katsuya ndau shapraw ai ndau shabra laika hta, “Mungdan lahkawng a masing masa ra sharawng ai lam ni nbung hkat ai raitim, ndai Mungdan lahkawng gaw langai hte langai a matu ahkyak ai htingbu Mungdan ni rai nga ra ai, Mung masa galaw ai masha ni, asuya ni a nhkrum nra, grai mazut ai masa tsun shaga lam galaw ai a majaw Mungdan lahkawng na mung chying sha ni a hku hkau ganawn mazum lam ni hpe jahten sharun kau ya ai lam nmai galaw ai,” nga nna  Saradaw Taiji Katsuya tsun dat nga ai.

Nambat lahkawng Mungkan majan laman hta Japan hpyen la ni Korea amyu shayi sha ni hpe aroi ara galaw lai wa ai mabyin lam ni hte seng nna bai shapri shanem hkat lam galaw ai magam lam ni hte seng nna shada myit ndik hkat lam ni nga pru nga ai majaw Mungdan lahkawng lapran sut masa htinglet hkat lam hta dingkren hkat lam ni grau grau tsaw jat wa nga ai rai nga ai.

Lai wa sai July shata praw 4 ya shani kaw nna, Japan Mungdan kaw na shapraw ai madang tsaw ai gun rai ni hpe Korea Mungdan de htaw shalai bang na ahkang dawm kau ai lam galaw dat ai, de a hpang August shata praw 12 ya shani, Korea Mungdan kaw nna mung sut masa hting let hkat lam hta lak san ahkaw ahkang jaw da ai Mungdan jahpan kaw nna Japan Mungdan hpe shaw dat ai. Korea Mungdan masha ni hku nna mung Japan Mungdan kaw nna shapraw ai gun rai ni hpe mari lang ai lam n-galaw na matu shamu shamawt ai lam ni galaw wa nga ma ai rai nga ai.

 Ndai zawn re ai masa ni a majaw Korea Mungdan hte Japan Mngdan lapran tsaw jat wa nga ai dingkren hkat lam ni hpe shayawm kau lu na matu Japan Saradaw ni kaw nna lajin ndau laika shapraw dat ai rai nga ai, nga nna Ucan shiga dap kaw nna shana dat nga ai.    

Source:ucannews