Ireland Mungdan Kahtawlik Nawku Hpung a Trocaire Magam Dap na Dat Kasa ni Myitkyina Sasana de du gawan

Maigan Sumtsan Mungdan shara shagu hta Shinggyim Bawngring lam ni hpe galaw nga ai Ireland Mungdan, Kahtawlik Nawku Hpung a #Trocaire ngu ai Agency Uhpung kaw na Jau ni law law lawm ai Dat kasa ni Myitkyina Sasana de 2018 November 8 ya shana maga de du sa wa ma ai.

Du sa wa ai Dat Kasa ni hpe Myitkyina Sasana Sagurem wa Wa Saradaw Francis Daw Tang,Wa Saradaw Paul Zinghtung Grawng hte Jau Ma Ma ni, Karuna KMSS Rung Magam gun ni hte Buga Hpung masha ni hku nna Htunghking magun lit hte shagrau ai lam ,htunghking bawnghkaw kumhpa ni hte hpawn Jinghpaw Wunpawng htunghking ka manawt ni, yu ngwi mahkawn  shangwi shapyaw ai lam hte wu wu di hkap tau hkalum la ai lam galaw la lai wa ai.

Myitkyina San Columban Nawku Jawng Wang hta galaw ai , Hkap tau hkalum ai lamang hta Myitkyina Sasana Sagurem wa, Wa Saradaw Francis Daw  Tang hku nna hkap hkalum mungga shaga la ai hte, du sa wa ai Dat Kasa ni hku nna mung, n myit n mada ai sha ya na zawn Jinghpaw htunghking  ni hte hkap tau hkalum la ai majaw n dang tsun hkra kabu chye ju dum ai lam, Myitkyina Sasana de du sa wa ai lam gaw, anhte Jinghpaw Nawku Hpung  ni hte Ireland Nawku Hpung a lapran matut mahkai ai lam hta grau grau mahkri shawn hku hkau ai lam lu la na matu hte Shingyim Wuhpung Uhpawng galu kaba bawngring lam ni hta grau masan sa ai hku ta gin dun let rau jawm galaw sa wa lu na matu,Jinghpaw Mungdaw na shingyim nga sa lam ni hpe shan hte hkum nan yu maram hka ja la lu na matu re ai lam chye lu ai.

N-dai Trocaire ngu ai Uhpung hpe Wa Sarabyin Paul VI kaw nna 1973 ning hta gaw de hpang ai rai nna, Ireland Mungdan, Maynooth College, County Kildare hta Daju da let Mungkan Mungdan shara shagu hkan Shinggyim Wuhpung uhpawng galu kaba rawt jat lam, Hpaji Lam,Tara Rap ra lam hte Matsan mayan hkrum nga ai ni hpe ahkyak hkyak garum madi shadaw ai lam ni hpe galaw nga ai Agency Kaba langai rai nga ai.

Trocaire Agency gaw, Myanmar Mungdan Kahtawlik Nawku Hpung a shingyim garum ningtum hpung KMSS hpe madi shadaw garum ya nga ai Maigan Agency langai mi mung rai nga ai.

Thomas