Iraq mungdan ramma dat kasa, Saradaw ni a hkumra hpawng kaba hta mungga shaga

Iraq Mungdan kaw nna du sa ai Al Abbia Saffa ngu ai ramma dat kasa kaw nna, sarawdaw ni a synod hkumra hpawng hta shi a mahkrum madup ni hpe tsun gam garan ai lam galaw lai wa ai.

Saffa gaw asak 26 re ai Iraq Chadean Kahtawlik ramma langai rai nga ai zawn wa sarawun langai mung rai nga ai. Iraq Mungdan ramma dat kasa hku nna saradaw ni a hkumra hpawng hta shang lawm na matu saw shaga da hkrum ai ramma rai nga ai.

Saradaw ni a hkumra hpawng hta Saffa tsun ai hta, “Iraq Mungdan na ramma ni gaw tinang a ahkaw ahkang sari hte nga pra lu na matu yak hkak lam hkrum nga ma ai. Ndai ramma ni law law gaw shanhte a kahpu kanau ni shanhte a man hta nan makam masham a majaw sat kau ai hkrum, shanhte a nawku jawng ni hpe bawm kapaw nat jahkyat kau ai hpe mu mada dat ai ni rai ma ai. Laban missa ngut nna, hpang na bat bai hkrum ga, ngu shakram kau da nna galoi mung bai nhkrum lu mat sai ramma manang ni a myi man hpe ya du hkra naw shingran mu nga ai, ndai manang ni nawku jawng kaw nna pru wa ai aten shanhte a maw daw bawm kapaw hkrum nna hkru hkat si lawm mat wa masai majaw rai nga ai, Iraq ramma ni kaw nna wa sarabyin hpe htet shana dat ai lam mung nga nga ai, dai gaw, lani mi na nhtoi hta wa sarabyin hpe Iraq Mungdan hta mu mada lu na ramma ni myit mada nga ma ai, ngu ai lam rai nga ai” nga nna Iraq ramma dat kasa Saffa tsun dat nga ai.

Saradaw ni a hkumra hpawng shang lawm ai a marang e lu la ai ahkyak ai mahkrum madup lahkwng hte seng nna Safa tsun ai hta gaw, “nam bat langai ngu na ahkyak ai lam gaw Iraq Mungdan ramma ni hkrum kadup nga ai mabyin lam ni hpe Mungkan chye hkra tsun hpaw dan lu ai ahkaw ahkang lu la ai, lahkawng ngu na mu chye dat lu ai ahkyak ai lam gaw mungkan Mungdan shara magup hta shanu nga ai ramma ni yawng hku nna mung lam amyu myu a majaw yak hkak mang hkang lam ni law law hkrum hkra nga ma ai, ngu ai lam rai nga ai. Ramma ni shada da ai yak hkak mang hkanglam ni hpe mu chye ya hkat ai a marang a shada garum ya hkat lu ai, nlaw htum shada da akyu hpyi garum ya lu nga ai” nga nna Saffa tsun dat nga ai.

Yak hkak hkrum nga ai Iraq ramma ni a matu akyu hpyi garum ya nga marit nga nna saw shaga let Saffa matut tsun ai hta gaw, “Iraq ramma ni myit daw nna makam masham hpe shingdu gayin kau mat wa na grai tsang ai, ndai zawn myit daw ai majaw byin wa lu ai lam hpan lahkawng nga nga ai, langai ngu na gaw ramma ni nawku jawng nsa rai nga ma wa mai ai, lahkawng ngu na lam gaw Iraq Mungdan kaw nna pru hkawm mat wa ai masa rai nga ai. 2003 ning hta, Hkriatian 1.5 daram Iraq Mungdan hta nga lai wa ai rai tim, ya aten hta sen mali daram sha ngam sai rai nga ai. Iraq Mungdan ngu ai shara hta tsa ban langai aten kaw nna Hkristian ni shanu nga ai shara re, Iraq Mungdan hta moi Hkrsitian ni nga lai wa yu ai da, ngu ai masa nmai byin shangun kaw na re, Ramma ni hkrum kadup nga ai yak hkak lam ni hte seng nna, Nawku hpung kaw lawan ladat htang shana, mahtai jaw yan hparan lam galaw ya na ra nga ai” nga nna Iraq mungdan ramma Al Abbia Saffa saradaw ni a hkumra hpawng hta tsun dat nga ai lam Vaticans shiga dap kaw nna shana dat nga ai. 

Source : Vatican News