Iraq Mungdan Na Nawku Hpung Hte Hkristan Wuhpung Ni A Lam (Daw Lahkawng)

Wa Sarabyin Francis a hpung kawan hkrun lam “apostolic journey” gaw 2021 ning (March 5 – 8 ) lapran hta rai nga ai. Iraq mungdan hkrun lam rai nga ai.

  Shim Lum Lam N Nga Ai Hkristan Wuhpung Wuhpawng Ni Jahkrit Shama Hkrum Dingyang rai Nga Ai.

  2017 shaning hta Iraq na Caliphate hpe hpyendap ni gasat la ai hpang Hkristan masha ni Mungkan Nawku Hpung a garum ya ai hte Nineveh pa layang de gawng ngwi ngwi rai bai htang wa ra ma ai. Madung garum ya ai gaw Sarabyin Rung na “the Pntifical foundation Aid to the Church in Need (ACN) kaw na rai nga ai. Daini Nineveh kaw nga taw ai Hkristan masha a tsa shadang mali shi manga (45%) gaw tinang a buga nta de bai htang wa sai rai nga ai. Tsa shadang masat shi (80%) daram a matu gaw shanhte nga na shara hpe bai gaw gap ya nga sai rai nga ai.

  Ya du hkra nga yang Iraq mung na hpyen yen Hkristan kun dinghku yawng a tsa shadang manga shi sanit (57%) daram a hten run mat sai dum nta ni hpe bai gram ya ngut sai rai nna, dai hta ACN a garum ya ai gaw tsa shadang sumshi manga (35%) lawm ai rai nga ai.

  Buga shawa balik ni hte jahten sharun hpung ni a lapran jahkrit shama hkrum ai lam matut manoi byin nga ai majaw Iraq na Hkristan wuhpung wuhpawng ni a matu shimlam n nga ai mayak lam ni hte dai ginra ni hta matsan mayan rai sak hkrung nga ra ma ai. Ndai shiga hpe Report "Life after Isis: New challenges to Christianity in Iraq",  2020 shaning ndau da ai hpe ACN kawn “Open Doors", gabaw ginlam hte Hkristan wuhpung ni hpe garum na lam tam hpang wa ai rai nga ai. “Centres of Hope” ngu ai gabaw hte hpang daw de matut garum ya nga ai lam chye lu ai.

Iraq Mung Shawa Masha Ni A Simsa Ai Hte Yawng Hte Seng Ai Myit Masa

  Covid-19 tsin-yam, mungdan kata shimlam n nga ai, mung masa n simsa ai, makam hpung garan ginhka ai, akyang lailen hten run dip lu dip sha ai lam ni law majaw Hkristan masha ni Mungdan de bai nhtang wa na lam pat shingdang ding yang rai nga ai. Ginlung kahkyin gumdim lam nga ai jihadi-free Iraq byin tai wa na matu gaw shanhte a mung shawa masha hku hkap la ya na grai nan ahkyak nga ai. Ndai gaw Hkristan nawku hpung ni hku nna mungdan tara upadi hte shinggyim nga sat nga sa lam hta grau myit jung ai hte shang lawm lu na matu yaw shada let hpyi shawn ai rai nga ai.

  Chaldean Patriarch H.B. Louis Raphael Sako kawn tara rapra lam hte yawng maren mara hkam sha lu ai tara upadi ni hpe gaw de da na ra sai lam tsun da sai rai nga ai.

Wa Sarabyin Rung Kaw Nna Iraq Hkristan Ni Hpe Yu Lakawn Nga Ai Lam

  Sarabyin Rung kaw nna Iraq Hkristan ni hpe yu lakawn ai lam hpe, grau nna, 2003 shaning, lahkawng lang ngu na Gulf War majan byin hpang ai ten, Wa Sarabyin Yawhan Pawlu II a lakhtat kaw nna nan madung da garum hpang wa ai.

  2014 shaning, Iraq hte Syria mungdan ni hta Islamic state (Islam Mungdaw) gaw gap hpang ai ten kaw nna mung masa lam grau shuk grau yak wa ai. Wa Sarabyin Francis gaw Iraq mung shawa masha ni hte ni ni htep htep nga nga ai lam shi a nsen hpe shapraw ai gaw dai zawn re masa lam ni a majaw mung grau ai rai nga ai. Ndai zawn ni htep lam hpe 2018 shaning hta Cardinal Pietro Parolin Iraq mungdan de sa kawan ai hta ndau shana ya sai rai nga ai.

  “Iraq na Hkristan masha ni gaw mungkan shara shagu hta nga nga ai Hkristan ni a matu kasi kamang tai nga ai” lam hpe dai hkrun lam hta Cardinal hkum nan tsun da ai.

  Wa Sarabyin 2019, June (10) ya sha ni Iraq mungdan sa kawan mayu ai lam tsun wa ai shaloi, shinggyim wuhpung wuhpawng ni hte makam masham hpung ni yawng shawng lam ni hta shawa akyu ara hte simsa ai lam ni hpe hkam la lu na myit mada ai lam tsun let 2020 shaning hta Iraq de sa kawan na lam ndau da ai.

  2020 January (25) ya shani Iraq mungdan Gumsan Magam Barham Sali (second official visit to the Vatican by President Barham Salih) Vatican de lahkawng lang ngu na sa du hkrum shaga ai shaloi Wa Sarabyin a Iraq hkrun lam gaw Iraq mungdan hte mungdan kata na Hkristan masha a labau shang tai wa na lam hte shanhte a shimlam hpe makawp maga ra na gaw ahkyak na re lam madi madun ya nga ai.

  Wa Sarabyin Francis mung Iraq hta nga nga ai Hkristan ni hte mungdan ting hpe makawp maga na gaw ahkyak ai lam 2020 December (10 )ya shani, Vatican Dicastery for the Service of integral Human Development with dozens of Catholic NGOs kawn lajang ya ai majaw Syrian hte Iraqi humanitarian Crisis hte seng nna hkrum shaga ai hta tsun da ai. Mungdan kata Hkristan ni nga nga ai gaw simsa ai hte tara rapra ai kumla, bawngring rawt jat ai kumla, htingram prinem ai kumla hpe madun lu ra ai lam video (video-message) hte  hkrum shaga ai shaloi tsun da ai.

  2020, December (7) ya shani Wa Sarabyin a Apostolic Journey” hpung kawan ai lam hpe galaw na lam Iraq kaw nga ai Nawku Hpung kawn hkap la ai lam ga nhtang da ai. Ndai hkrunlam hpe daining, 2021 March ( 5-8 )hta Wa Sarabyin Francis a Iraq hkrunlam hpang nga sai. Dai gaw lai wa sai (2000) ning hta Wa Sarabyin Yawhan Pawlu II a Iraq hkrunlam teng wa ai rai nga ai. Abraham, Moses, Yesu hte Pawlu ni a lagaw hkang nga nga ai mungdan Iraq mungdan rai nga ai.

Source; Vatican News