Indonesia Mungdan Kata Na Nawku Hpung Ni N-Nang Nawn Tsin-Yam Hkrum Masha Ni Hpe Sa Garum Ai Laml

Caritas Indonesia (Karina) woi awn let Indonesia Mungdan kata Sulawesi mungdaw a sinna maga nga ai Makassar Saradaw Ginwang hta lamu ga n-nang nawn kaba lai mat ai majaw jam jau hkrum masha law law nga nga ai ni hpe sa garum la ai shiga hpe Vatican Shiga Dap kaw nna ndau da ma ai.Dai n-nang nawn tsin-yam a majaw masha n law htum marai 84 si mat sai lam, masha hkying hku re ai ni gaw shanhte a dum nta ni hpe tawn kau da nna hprawng hkawm ra mat ai lam chye lu ai.

N-nang nawn madang maganitude 6.2 madang hte January 15 ya shani, n-nang nawn kaba nawn lai wa ai majaw Mamuju mare kaba hte Sulawesi Zinglawng ting kaw hkra machyi kaba hkrum lai mat sai lam chye lu ai.Hkye mawoi hpung ni tsun ai hte maren, Mamuju hta masha marai 73, Majene hta marai 11 si mat ai lam, Masha 900 lahta de hkala hkrum ma ai lam, masha marai 300 gaw tsi tsi lajang hkam la nga ding yang re ai lam, hkring hku re ai dum nta ni hten run mat ai lam, matut mahkai jak rung jak rai law law hte electric wan ni grai hten sum mat sai lam ni chye lu ai.

Caritas Indonesia (Karina) hte Sulawesi mungdaw dingda maga na Makassar Saradaw Ginwang kaba na Caritas ni gaw Mamuju na St. Mary Queen of the Rosary Jau ginwang hte ta gindun let n-nang nawn tsin-yam hkrum masha ni hpe hkyak hkyak garum shingtau nga ma ai lam chye lu ai..Makassar Saradaw Ginwang na Caritas lit hkam Wa Jau Bernard Cakra Arung Raya tsun ai hta shi a magam gun masha ni mamuju hte Majene ginra ni hta Caritas a mying hte garum shingtau lam ni hpe aten tup galaw nga ai lam chye lu ai.

Indonesia Caritas a Direrctor Wa Jau Fredy Rante Taruk mung shi a magam gun ni dai tsin-yam hkrum masha ni hpe malu masha, hka, hpun nba ni hte kaga tsi mawan ni garum nga sai lam UCA shiga dap de tsun shana da ai. Covid-19 tsin-yam hkrum ten ndai zawn re n myit mada n-nang nawn tsin-yam matut hkrum sha ra ai jam jau masha ni hpe garum na masha law law ra nga ai lam, Sulawesi mungdaw hta coronavirus ana kanu kap masha 2500 lahta de rai nna, 58 gaw si mat sai lam tsun dan wa ai.

Wa Sarabyin Francis mung dai tsin-yam a majaw si mat ai ni, hkala ai ni, bungli kata rai mat ai ni hte hkrat sum mat ai lam ni yawng a matu akyu hpyi ya nga ai lam Vatican Shiga Dap kaw nna ndau da ma ai.

Source; Vatican News