India Mungdan Hta Kahtawlik Nawku Hpung Kaw Nna, Covid – 19 Ana Makawp Maga Center Daju Hpaw Hpang Da

India Mungdan, Saradaw Zuphpawng kaw nna, San John Tsi Jawng hpe August shata 17, 2020 bat 1 ya shani, Saradaw Kaba Archbishop Peter Machado kaw nna akyu hpyi shaman let hpaw hpang da sai lam chye lu ai.

San John Tsi rung hta machyi masha a matu yup yupku 48, tsi jep lajang na yupku 24 hpe lajang da lu sai. Nawku hpung a madung yaw shada ai gaw matsan mayan ni hte ra kadawn ai ni a matu rai nga ai. “Dai zawn galaw da lu ai hta ap nawng lu ai ni gaw tinang hkum tingyen a matu nmyit ai sha ra kadawn ai ni a matu madung daw jau lu ai ahkaw ahkang kaba langai rai nga ai,” ngu Saradaw Kaba Machado UCA shiga ni de tsun da ai.

“Ndai tsi rung gaw hkamja lam hte seng nna ra kadawn ai ni hpe garum ya na matu rai nga ai. Ndai zawn garum lu na matu ra mara garum ya sai ni hpe chyeju kaba ga ai”, ngu mung matut tsun da ai.

Ndai tsi rung hta lai wa sai shata manga laman kaw sha, US$ 67,000 daram manu nga ai tsi ni hpe jai lang nna tsi jep tsi lajang ai lam hpe galaw hpang wa sai lam mung chye lu ai.

July htum maga de matsing da lu ai machyi masha tsi lajang ai 5,000 lahta de rai nna, 2,000 daram gaw hkyak hkyak tsi lajang ra ai (emergency department) hta tsi lajang ya lu sai.

Ndai zawn yak hkrak jam jau hkrum aten ni hta anhte ni galaw lu ai made lajang da nna ra kadawn ai ni hpe yu lakawn lu saga ai” ngu San John’s National Academic a director, Wa Jau Pau Parthazham kaw nna UNA shiga dap de tsun dan wa ai.

San John’s National Academy tsi Jawng hpe 1963 shaning hta, India Mungdan kata na Saradaw hpawng kawn hpaw hpang da sai lam chye lu ai. Madung yaw shada lam gaw matsan mayan ni hte ra kadawn ai machyi masha ni hpe tsi shamai ya lu na matu rai nga ai lam Vatican shiga kaw nna ndau da ma ai.

22 August 2020, 17:18

Source : Vatican News