India mung Ranchi Saradaw ginwang kawn grai ra kadawn taw ai ni hpe garum kahtau ai jaw lai wa sai shiga!

Online Photo

Mare kaba law malawng hta mungdan Asuya hku nna, lockdown ngu ai pat shing dang ai lam ni hpe shayawm wa dingyang rai nga tim, Mungkan ting hta covid 19 ana zinli a majaw kanbau bungli lam shagu hta hkrat sum dingyang rai taw ai. India mung sinpraw Jharkhan mungdaw Rachi Saradaw Sasana gaw, grau yak hkak nga ai ni hpe garum kahtau bungli galaw nga ma ai.

Masha shada myit tau chye ai lam, rau sha re ai lam hte shalan shabran ai lam hpe amyu ru sai ginghka ai lam nnga ai sha garum kahtau ai lam yawng hpe jaw ai gaw India mung sinpraw Jharkhan mungdaw Rachi Saradaw Sasana hku nna hkyak hkyak shakut taw ai magam masing rai nga ai.

India mung gaw Covid 19 ana zinli grai sawng ai mungdan rai nga ai. Pat shing dang ai lam hta grai jep da tim shara n kau mi kaw gaw yet yet rai nna hpaw ya ai lam ni mung nga ai. Dai ni hta gaw hpaji jawng ni, mungkan madang matut mahkai nbungli lam, modaw daru ni hte ban sa shara ni hpe mungdan Asuya a masing hte maren yet yet hpaw hpang ya ai lam ni nga ai.

Ranchi Myo na Wa Saradaw kaba Felix Toppo hte ningtau saradaw Theodore Mascarenhas yan gaw Wa Jau ni, Jau tai jawng ma ni, ramma ni hte rau ta gindun nna yak hkak hkrum taw nga ai hpu nau Harijan Muslim hte bawsang htinggaw yawng pawng (300) jan hpe garum lai wa sai.

Ndai zawn garum gahtau ai lam gaw Yesu a salum ningsang poi shani a dan dawng dik ai namnak rawng ai lam langai rai nga ai.

N-gu, shapre amyu myu, lasi shapre hte laga arung arai ni lawm ai sumpu hpe Dom Koch kaw na gimsum hkan nga ai matsan mayan re ai Harijan htinggaw 50 jan hte Kafur kaw na gimsum hkan nga ai ra kadawn taw ai htinggaw 90 jan hpe mung garum lai wa sai.

Kuldip Tirkey Saradaw Sasana na Catholic ramma ningbaw tsun ai hte maren “buga hpung ningbaw ni gaw amyu, rusai, hpung n ging hka ai sha yawng hpe" ngu ai ga-baw hku nna garum lai wa sai re lam chye lu ai.

Saradaw ni, Jau ni, mama ni hte Gala mung saradaw ginwang shagu na hpung masha ni gaw yak hkak hkrum nga ai bu htawt masha ni, numsha ni, matsan mayan re ai htinggaw ni hte laga ni hpe lusha, tsi hte laga ra ai arung arai ni hpe garan jaw lai wa sai.

June 16 shawng hta gaw Wasaradaw kaba hku nna woi awn let wuhpung lahkawng garan nna Ranchi shara kaw na mare ni hta htinggaw 170 jan nga ai rawt malan dinghku ni hpe hkamja lam hte seng ai arung arai ni hte malu masha amyu myu garan ya lai wa sai.

June 7, Chyoi pra ai Trinita laban hta gaw Ranchi mare kaba kaw cycle garawt nna kan bau bungli yak hka hkrum sha nga ai htinggaw 1000 jan hpe lu sha hte hkam ja lam arung arai ni garan jaw lai wa sai.

Jharkhand kaw nga ai masha wan (32) jan hta na, wan (9) jan gaw bawsang hte seng ai myu ni rai nga ai, dai hta wan (1.5) gaw hkristan ni rai nna, de a ka-ang hkup gaw Kahtawlik hpung masha ni rai ma ai lam RVA Jinghpaw Nsen Shapoi Dap kawn ndau dat ga ai.

 

Translated by Fr. Peter Lagai Tu Hkawng

 

https://www.vaticannews.va/en/church/news/2020-06/india-ranchi-archdiocese-food-disadvantaged-muslims-tribals.html

 

Add new comment

5 + 2 =