India Kahtawlik Jau A Sumla Hkrung Kadun Kumhpa Lahkawng Shagrau Hkrum

image from Vatican website

"Carlo" ngu ai sumla hkrung kadun hpe gayat madun lai wa ai India mungdan na Kahtawlik Jau langai, India Mungdan, Dingdung Mungdaw, Agra mare kaba hta November 17 ya shani galaw ai, Global Taj International Film Festival (GTIFF) kawn shagrau ai kumhpa lahkawng hpe hkam la lu ai re lam chye lu ai.

The Best Short Film Award hte the Best Line Producer Award hpe shagrau hkrum ai re lam chye lu ai. Shagrau hkrum ai Jau gaw Sinna India, Archdiocese of Goa hte Daman kaw na Wa Jau Leslie Bosco Rego, director of the film "Carlo", rai nga ai.

Sumla hkrung kadun hpe gaw November 12 ya shani madun lai wa ai re lam chye lu ai.

Sumla hkrung kadun hpe Italy myusha, computer hte internet gem rai nga ai Kahtawlik ramma "Alu ai Carlo Acutis" a prat labau hpe la nna gayat da ai re lam chye lu ai.

Alu ai Carlo gaw Hkristu hpe, ya na prat dep masa hta hkan nna ndau shana sakse hkam ai wa rai nga ai, nga nna sumla hkrung kadun gayat ai Rego tsun sakse hkam da ai.

Shi a kanu yan kawa gaw makam masham lam hta grai wa shakut shaja ai yan n rai tim, Carlo gaw Karai Kasang hpe tsaw ra myit kaba ai wa rai nga ai.

Shi gaw programmer langai rai nna website catalogue gaw chyaw let Missa Hkungga a mau hpa lamik kumla ni hpe dai website kaw mara nna Hkristu hpe sakse hkam shachyam shabra lai wa ai wa rai nga ai.

Shi hpe, ma kaji ni hpe makawp maga ai wa, grau nna n kung kang re ai ma ni hpe pawnba la ai wa hku nna chye da lai wa ma ai.

Ramma prat sak naw ram ai ten kaw nna nan Carlo gaw Leukemia (sichyu) ana kap machyi hkrum ai wa rai nga ai.

Shi gaw 1991, May 3 ya shani, United Kingdom, London kaw shangai wa nna, 2006 October 12 hta Italy, Munza kaw Madu hta wun doi wa sai rai nga ai.

2020 October 10 ya sha ni shi hpe "Alu ai wa" ngu nna, Wa Sarabyin Francis kawn tang da sai rai nga ai.

Ramma ni hte commuter programmer ni a kam hpa shara San Pra ai wa ngu masat da sai rai nga ai.

Sumla hkrung kadun gayat lai wa ai aten gaw grai n loi la ai; nem dat tsaw dat rai nna matut manoi shakut ai a majaw hpang jahtum e gaw yawng shangut la lu ai re, nga nna Rega sakse hkam da ai.

Ndai sumla hkrung kadun galaw nga ai aten ni hta rau rai nga ya ai Karai Kasang hpe chyeju dum ai lam, Shi a majaw she, tsaw ra myit kaba ai ramma langai a prat hpe hkrang shala dan lu ai re nga nna mung Rego sakse hkam da ai.

Sumla hkrung kadun hpe grau nna dai ni na prat na ramma ni hte ma kaji ni hpe madung da nna prat hta hkan nna modern techology hpe gara hku akyu jashawn ra ai lam madun dan na yaw shada ai re lam mung Rego sanglang da ai.

GTIFF kawn ndai "Carlo" sumla hkrung kadun hpe lata let kumhpa shagrau hkrum ai gaw anhte ni a matu shaman chyeju kaba nan rai nga ai, nga nna mung tsun da nga ai hpe (www.rvasia.org) website kaw ndau da ya ma ai.

 

Fr. Patrick Gawmaw Hkawng Yae

#rvaenglishwebsite

#rvakachinservice

https://www.rvasia.org/asian-news/indian-catholic-priests-short-film-wins-two-awards

fek

Add new comment

5 + 11 =