ICRC Hte MRCS Kawn Pang Sau Jau Ginwang De Malu Masha Hte Hkamja Lam Hte Seng Ai Arung Arai Ni Madi Shadaw Garum Ya

9 September 2020, Myitkyina

Covid-19 byin nga ai ten, malu masha yak hkak hkrum nga ai Pang Sau Jau Ginwang na Naga hpu nau ni hpe garum lu na matu International Committee of Red Cross (ICRC) hte Myanmar Red Cross Socities (MRCS) kawn n-gu buk 289 hte Hygen Kids 100 jaw ya ai lam chye lu ai.

Garum arung arai ni hpe  September 9, 2020 ya jahpawt, Myitkyina Sasana Ginwang up, Wa Saradaw Francis Daw Tang the Myitkyina Sasana Covid-19 ninghkap Komiti Ningbaw Wa Jau Joseph Zinghtung La Nu ni kawn hkap la lu sai re.

Kahtawlik Nawku Hpung, Covid-19 kaw na makawp maga masing ginjaw komiti kawn Jau Ginwang shagu de yak hkak nga ai ni hpe mai byin ai daram madi shadaw garum ya nga ai raitim Corona Virus byin ai aten galu wa ai hte maren grau nna yak hkak nga ai ni hpe matut garum lu na matu hpyi shawn dat ai shaloi ya na zawn ICRC hte MRCS ni lata gindun nna alu jaw garum ya ai re lam Wa Jau La Nu tsun lai wa ai.

“ Naga Mung de Putao de malu masha grai yak nga ai lam shi ga na ai hte Nawku hpung kawn garum lu na lam tam ai shaloi ICRC hte MRCS ni myit hkrum let garum mai ai nga nna ya na zawn rau lata gindun let garum jaw ya ai lam re, dai hpe dai ni gaw lata masat htu hkap la ai lam rai nga ai ”

 nga nna Wa Jau La Nu tsun lai wa ai.

Bai nna, Buga shawa masha ni kawn Myitkyina Sasan, Covid-19 kaw na  Makawp Maga Masing Ginjaw Komiti de alu jaw da ai n-gu buk 100, Sau joi 100 hte Shakau hkyeng buk 100 hpe mung Shingbwi Yang Jau Ginwang de madi shadaw garum jaw ya na re lam chye lu ai.

Putao Ginwang de garum ningtum lu na matu htaw wa htaw sa hkrun lam yak hkak nga ai hte alu madu ni kaw nna mung Ja gumhpraw (Cash) garum na hta, kaja nan ra kadawn nga ai malu masha hte arung arai ni hpe sha ading tawk madi shadaw jaw ya na matu mai byin ai re majaw, ya ten hta Madaw mai du ai shara Nan Yun, Pang Sau hte Shingbwi Yang Mare de shawng garum ai re lam chye lu ai.

Madi shadaw garum ai arung arai ni hpe htaw shalai lu na matu Asuya Rung de ahkang hpyi laika tang shawn da sai rai nna, ndai September 10 jan ya laman shalai ya lu na re lam Wa Jau La Nu tsun ai hte maren chye lu ai.

Thomas