Hpyen Yen Tsinyam Hkrum 8 Ninghpring N Gun La Akyu Hpyi Hpawng Galaw

8 June 2019, Myitkyina

Hpyen tsin yam hkrum 8 ning hpring n-gun la akyu hpyi hpawng hte hpyen yen myu sha ni hkrum sha nga ai mayak lam hpe htawng madun ai lamang hpe Myitkyina Shatapru Manau wang kaw 2019 June shata praw 8 ya shani galaw lai wa sai rai nga ai.

Hpyen yen tsin yam hkrum ai (8) ning hpring ai nhtoi gaw June shata 9 ya shani raitim laban nhtoi ang taw ai majaw June (8) ya shani galaw ai re lam, akyu hpyi lamang a yaw shada ai lam gaw,  Hpyen yen ni hpe madi shadaw garum ningtum ai lam ni hpe Asuya kaw nna dawm kau shangun ai zawn re ai ni nga ai majaw hpyen yen tsinyam hkrum masha ni a mayak mang hkang lam ni hpe chye ya nna ta tut tang du ai garum madi shadaw lam ni matut lu na matu hte Hpyen yen ni shim lum simsa ai , shinggyim ahkaw hkang hpring ai, sari sadang hpring ai hku tinang dum nta de wa lu la na lam hpe seng ang ai ni kawn jahkrum bawngban hkrang shapraw ya na matu yaw shada let galaw ai re lam chye lu ga ai.

Dai ning na lamang galaw ai hta, hpyen yen kata na hpu nau ni hte kanu kawa daw hpum daw nu tai ya ai WMR, PCG hte, nawku makam masham hpung woi Sara ni sha sa du  shanglawm ai nna, Buga ginra hkan na hpung shawa masha ni sa du ai  ni nlaw ai lam hpe mu lu ai.

Shaning shagu masha hkying kaba sa du lawm ai hpyen yen tsin yam hkrum n-gun la akyu hpyi hpawng hta ndai 8 lang na lang na lamang hta  ya na  zawn masha n sa du lawm ai lam gaw tsang 10 san poi mahtai shapraw ya ai ninghtoi shani mung rai nna, dai jahpawt Myitkyina kaw marang kaba htu nna lamu marang n htuk ai majaw rai na re nga nna tsun shajang nga ma ai.Shawa masha law law n sa du ai majaw myit n pyaw ai lam KHCC ningbaw Sara Kaba Rev.Dr.Hkalum Sam Son kawn tsun shapraw dat nga ai.

Hpawng lamang hta Maina KBC IDPs camp kaw nga ai shayi Ting Win kawn hpyen yen tsin yam hkrum masha ni garan ginhka hkrum ai lam hte seng nna hkrap let tsun shapraw dan ai lam hta ,jawng lung nga ai hpyen yen ma ni jawng gawk kata Sara Sarama n kau ni kawn garan ginhka nna tsun shaga hkrum ai lam, makau grup yin kawn yu kaji hkrum ai lam ni a majaw myit daw nna jawng nlung mat ai zawn re lam dam mat ai hpyen yen ma ni a masa lam ni hpe tang  madun dan ai majaw sa du madat ai ni mung myi prwi si  hkrat hkra myit n pyaw lawm ma ai lam hpe mung mu lu nga ai.

Hpawng ngut ai shaloi hpyen yen tsin yam hkrum hpu nau ni a prat hpe myit dum sawn lu na matu jum hte shat chyahpraw hpe gam garan jaw ma ai.

Kachin Youth Movement kawn woi awn let, Hpyen yen Ramma ni kaw nna June 9 ya shana maga hkying 4:00PM ten hta Myitkyina Tsin Mya Ayeya Numpan sun shawng kaw  mung, Shawa Ginsup Ginra ( ျပည္သူ႕ရင္ျပင္) kaw mung lahkawng lang, Street Performance ngu ai masha law ai shara lam  nummaw hkan hpyen yen tsin yam hkrum katup ai lam hpe ta tut hkrang shala shingni madun ai lamang ni hpe matut galaw lai wa sai lam chye lu ai

Ya ten dai lamang hpe woi awn galaw ai Shadang Paulu hte Seng Nu Pan hpe tara n shang ai lam galaw ai ngu nna Myitkyina masat langai balik dap kawn  dap de shaga nna san jep ai lam galaw hkrum nga ai lam, du na June shata 19 ya shani Tara rung kaw kalang bai san jep na matu ndat n htoi masat da ai lam chye lu ga ai.

Npu na sumla gaw Hpyen yen 8 ning hpring street performance hpe Myitkyina Shawa Ginsup Pa kaw galaw ai sumla rai nga ai. / Photo:KBC KACHIN

Ref:Kachinwaves,Kachin Youth Movement