Hpakan Lungseng Maw Ginra hta ga gyi gaput si ai ni a Wenyi matu Wa Saradaw Francis woi awn let Misa Hkungga nawng jau ya ai shiga

Wa Saradaw Francis Daw Tang gaw Myitkyina, San Columban Nawku Jawng hta, Hpakan Jau Ginwang kata Goi Hka Mare kaw lungseng htu myeza bum gyi kaput na si ai ni a wenyi matu July 4, bat kyu ya jahpawt nawng jau ai Misa Hkungga hta ap nawng akyu ya ai.

Myikyina hte ni nawn ai Jau ginwang hkan na Ginwang Up Jau ni hte Rung ni hta lit la woi awn nga ai Jau ni hpe dai Misa Hkungga nawng jau ai hta shang lawm na matu mung saw saga ai.

Misha hkungga nawng jau ai hta Myitkyina Sasana kata magam gun nga ai jau nkau ni dai Misa hkungga nawng jau ai hta shang lawm ma ai. Wa Saradaw Francis Daw Tang shi hkum nan Main Celebrant hku misa hkungga nawng woi ai rai nna, Mungga hpe Myitkyina Ginwang Up Jau John Galang La Raw Kawn Karai mungga htawn ya ai.

Myikyina Saradaw Sasana Chancellor Wa Jau Paul Wanghte Lum Dau kawn lit la nna Myitkyina Sasana kata na Ginwang up Jau ni hte Hpung Masha ni hpe mai byin ai made shang lawm garum akyu hpyi na matu saw saga da ai lam chye lu ai.

Myitkyina Saradaw Sasana Kata Seng ang ai Jau kaba ni hte Lit Hkam Saradaw ndai tsin-yam hkrum ai ni hpe Nawku hpung kawn garum sa wa na lu na matu June 3, bat 5 ya shani hkyak hkyak zuphpawng ma ai lam mung chye lu ai.

Myitkyina Saradaw Sasana lit hkam Saradaw kawn Myanmar mung kata Saradaw Sasana shagu na lit hkam Saradaw ni hpe mung dai tsin-yam hta si lawm mat sai ni hte hkala hkrum ai ni hte shanhte a nta masha ni a matu akyu hpyi garum ya na matu hpyi shawn da ai lam chye lu ai.

Hpakan Ginwang Up Jau James Zukdaw Zung Ding mung dai ginra na Hpung sara ni hte hkye mawoi hpung ni rau mabying shara hte si mat ai ni a moi mang tawn da ai shara ni hta sa du akyu hpyi ya ai hte Hpung woi ni hte hkye mawoi hpung ni hpe Nawku hpung a malai shang lawm garum na matu lit shatsam da ai lam chye lu ai.

Lungseng maw hta shaning shagu marang ta hta bying ai mabyin rai nga ai myeza bum ga gyi ai lam 2020 shaning hta sawng dik htu ai myeza bum ga gyi kaput ai lam rai nga ai. Bying ai nhtoi gaw June 2, bat 4 ya jahpawnt, hkying 6 chyan daram kaw re ai lam chye lu ai.

Myeza ga gaput ai hta lawm mat ai masha marai kade re hpe gaw hkrak nchye lu shi ai. June 4 ya jahpawt na 7day shiga dap kawn shapoi ai hta ga gaput lawm mat ai masha hkum tsawp 173 hpe mu tam la sai lam chye lu ai. Hka la ai masha mung law law lawm ai lam chye lu ai. Woi Hka mare Lit hkam sara Peter Yaing Nan Kyaw Swa shana wa ai hta hka la ai masha marai 54 rai nga sai lam mung chye lu ai.

Bying ai shani kaw na Hkye Mawoi Hpung ni shani shana ga gaput lawm mat sai ni a moi mang ni hpe tam shakut nga ma ai. Hkye mawoi hpung ni hta shang lawm ap nawng ai masha ni mung law law rai nga ma lam chye lu ai.

Laika ka ai wa a myit lu ai lam
Lungseng maw hta ndai zawn bying ai gaw masha galaw ai majaw rai nga ai. Shingra maka hte seng na bying ai mabying nrai nga ai. Mungdan Asuya ni myit yu sawn yu ma ai kun? Laika htuk shapraw na sha ngut ai bungli rai nga ai. Dai zawn nbying hkra tau nau myit hkrum bawngban da ai hta tinang shang ai shara hpe lit la na lam nlawm ma ai kun? Bying wa jang lit la ra ai ngu ai myit hkrum ta masat htu ai lam ni nnga ai. kun? Ja Gumhpraw hte seng na sha myit hkrum bawngban lam ga law ma ai kun?

Wa Jau Patrick Gawmaw Hkawng Yae

RVA Jinghpaw Nsen Shapoi Dap

#rvakachinservice