Hong Kong Cardinal: Gasu Kabrawng Ai Lam Byin Nga Ai Shinggyim Wuhpung Wuhpawng Kata, Kam Sham Ai Ni Yawng Galum Gahkyin Nga Na Matu Saw Shaga Da Ai

photo from vatican website

Thursday, October 01, 2020

Hong Kong kaw na Cardinal John Tong Hon gaw kade nna shi ai aten hta Nawku Hpung masha ni hpe shadum ai Pastoral Letter langai hpe ka shale ndau ai lam galaw da ai: Hong Kong na mung shawa masha ni hta byin nga ai gasu kabrawng ai lam hpe shazim ya na matu rai nga ai.

“Mung shawa masha ni hta grau dam lada, tsaw grau ai tara rapra lam nga ai democracy mung masa hpe myit mada let hkawm sa na ahkaw ahkang nga nga ai”, ngu Cardinal Tong Hon hpaw tsun da ai.

Hong Kong mung shawa masha ni hta na Kahtawlik Hpung masha ni lapran mung myit garan nga ai hpe mu lu ai majaw ndai zawn shadum ai mung rai nga ai.

Shinggyim lailen lam ni hte mung masa lam ni hta mung shawa masha ni a ningmu hpe wang lu wang la hpaw tsun shapraw dan na hte mahtai tam na wang lu wang la ai ahkaw ahkang nga ra ai ngu Cardinal madi madun da ai.

Nawku Hpung kata garan ginhka na lam byin shangun ai ningmu shai ai madin ni hpe n mai jaw ai lam; Nawku Hpung daju rai nga ai Vatican kaw na matsun ai hte maren hkawm sa ai gaw shara shagun na nawku hpung masha ni yawng galum gakhyin ai tai nga ai re ngu mung matut shadum da ai.

Nawku Hpung gaw democracy up hkang masa hpe madi shadaw ai re. Wa Sarabyin Francis a apostolic exhortation laika Evangelii Gaudium hta shinggyim masha ni a simla lam, tara rapra lam, nau na shada tsaw ra hkung ai lam ni nga hkra mung masha langai hpra hta lit nga ai ngu ka da ai.

Shinggyim bawng ring lam hte mung masa lam ni hta galu kaba rawt jat wa hkra gaw nawku hpung a sharing shaga lam rai nga ai “the social teaching of the Church” hta matsun maroi jaw da ai hte maren hkan sa ra ai. Yesu Madu sharin ya ai “A Lu Ai Tara Lam Ni” hte “Yesu Bum Ntsa Kaw Sharin Shaga Da Ai Tara Lam Ni” hpe hkan shatup sa ra ai. Masha kaga ni hpe n-dawng n-yawt nna, hpyen shatai ai lam ni gaw Hkristan Makam hte n-htan shai ai re ngu mung tsun da ai.

Hkristu wudang ntsa si hkam ai gaw anhte Hkristan ni yawng hkan nang hkan shatup na kasi kamang kaba re. N-hkrum n-ra ai lam byin shagu, simsa lam hte tara rapra lam hpe lu la hkra gaw, nau na shada tsaw ra ai, mara dat ya hkat ai, hte pri nem ai lam hpe hkam la lu na matu ta tut hkrang shapraw let dai n-hkrum n-ra ai lam a mahtai hpe tam la lu na re.

Nawku hpung woi Jau ni gaw kam sham ai hpung masha ni nawku hpung a sharin shaga ai matsun lam ni hte maren jaw ang ai mung masa lam hpe lata la lu na matu lam matsun ya ra ai. Rai ti mung, Jau ni gaw dai mung masa lam hta shingkang ka-up ai lam gaw n-mai galaw ai.

Vatican II hta bawng ban nna lam matsun da ai Hierarchy up hkang masa hte maren Kahtawlik nawku hpung masha shagu gaw “sensu fidelium” “sense of faith” “makam hte seng ai” lam ni hpe sakse hkam sa ra ai.

Shi a Pastoral letter hta Cardinal matut tsun hpaw dan ai shi a ningmu gaw “Hong Kong na kahtawlik nawku hpung masha nkau ni hta mungdan a shawng lam hte seng ai lam ni hpe n-kaja ai hku sha mu mada nga ma ai ngu rai nga ai.

“Nawku hpung masha ni Yesu Hkristu hta kam hpa myit mada ai lam n yawm mat u ga matu akroi anoi hpyi sawn nngai” ngu Cardinal Tong Hon, Hong Kong kaw na hpung masha ni hpe hpyi sawn da ai.

Jathum ginchyum dat laika hta Karai Kasang gaw anhte shinggyim masha ni a kam maka jahtum re; shinggyim masha ni lapran ngang gring ai zinlum gakyin gum ding lam nga ra ai; nawku hpung masha langai hte langai shai hkak ai lam ni nga ai rai tim, Karai Kasang hta kam sham kam hpa let shi a sharin shaga ai mungga hta hkawm sa nna myit mang langai sha hta zinlum gahkying gum ding nga ra ai ai ngu ga ga hpum ding da ai.

Ndai shiga hpe Vatican Shiga Shapoi Dap kaw nna ndau da ma ai.