Hkristu Madu Iraq Hta Mung Sak Hkrung Let Magam Bungli Woi Awn Ya Nga

Wa Sarabyin Francis Iraq mungdan hta masum ya ngu na shani, March 7, laban ya shani, Erbil ngu ai shara kaw Mungdan Gumsan Magam hte Iraqi Kurdistan na Hkringmang Daju salang kaba yan hte hkrum hpang let mungdan ningbaw ningla ni hte makam masham hpung na hpa-awn ni hte hkrum shaga ai lam hpe matut manoi galaw lai wa ai.

Dai zawn hkrum shaga ai hta nau na majing myit jasat tawn da let myit mada lam hte simsa lam hpe bai gaw sharawt shatsawm na matu shadum n-gun jaw lai wa ai lam chye lu ai.

Erbil kaw nna Mosul de bai matut hkawm sa let ISIS ni jahten sharun kau ai Iraq hte sinpraw Iraq (Middle East) na tsin-yam hkrum masha ni a simsa lam matu akyu hpyi ya lai wa ai.

Dai hpang Iraq dingdung maga na Qaraosh hta nga ai “Immaculate Conception” Mara Kata Na-um Na-sin Maria Nawku Jawng hta dai ginra kaw nga ai Hkristan nawku Hpung masha ni hte hkrum shaga lai wa ai rai nna “jahten sharun ai ni hpe mara dat ya let nau na myit masin hte shanhte a wuhpung wuhpawng hpe bai gaw de sa wa na matu n-gun jaw lai wa ai.

Dai hpang Erbil de bai n htang wa nna kamsham ai hpung masha 10,000 daram hte Laban Misa Hkungga nawng jau woi ai lam chye lu ai.

Misa Hkungga na mungga hta “Daini, Iraq na nawku hpung gaw sak hkrung nga ai hpe ngai mu se ai. Dai gaw Hkristu Madu Iraq na nawku hpung masha ni hte rau sak hkrung let magam bungli woi galaw nga ai rai nga ai. Chyoi Pra san seng ai magam nan rai nga ai” ngu n-gun jaw da ai lam Vatican Shiga Dap kaw nna Wa Sarabyin Francis a masum ya ngu na Iraq hkrunlam hpe kadun ai hku ndau da ma ai.  

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-03/highlights-of-pope-francis-third-day-in-iraq.html