Hkristan Nawku Hpung Masha Ni Myit Hkrum Kahkyin Gumding Lam A Matu Akyu Hpyi Ten Bai Du Sai

Shaning shagu January 18 – 25 lapran galaw ai Hkristan Nawku Hpung shagu na Nawku Hpung masha ni galung kahkying gumding lam a matu bat mi tup hpawng de akyu hpyi ai aten bai du wa sai rai nga ai.

Ndai akyu hpyi hpawng hpe shaning shagu mungkan ting hta galaw ai rai nga ai. Daining 2021 shaning na akyu hpyi hpawng gaw (54) lang ngu na Hkristan Nawku Hpung masha ni myit hkrum galung kahkying gumding lam a matu bat mi tup akyu hpyin shaning du sai rai nga ai.

Shaning latsa (100) lahta de rai mat sai ndai akyu hpyi hpawng gaw mungkan ting hta nga nga ai Hkristan masha ni mu mada ai Hkristan galung kahkying gumding lam a matu arau hpawng de akyu hpyi ai lam rai nna, Madu Yesu a hpang jahtum daw sha poi akyu hpyi ga hte maren yawng gaw langai hta sha jawm hpawng de wa na matu rai nga ai.

Daining 2021 shaning na matu manoi ga gaw “Abide in my love and you shall bear much fruit”, “Ngai a tsaw ra myit hta noi nga mu, shing rai jang nanhte apu asi law law si wa lu na mara ai” ngu ai rai nga ai (Yawhan 15:5-9). Ndai gaw Hkristan wuhpung wuhpawng ni hpawng de nna akyu hpyi ai hte shada htingram lam a matu galaw gun hpai ai lam a matu aten nan rai nga ai. Hkristan kun dinghku masha ni yawng, hpan da hkrum nga yawng nga pra hte rau langai hta sha galung kahkying gumding wa na matu rai nga ai.

(54) lang ngu na Hkristan Nawku Hpung masha ni myit hkrum galung kahkying gumding lam a matu bat mi tup akyu hpyi hpang lamang shangut ai nhtoi ang ai January 25, bat langai ya shani Wa Sarabyin Francis hkum nan tingyang up tai let hpu nau Hkristan hpung woi ni hte arau nawku daw jau lamang ginchyum dat akyu hpyi na re lam chye lu ai.

Shaning shagu galaw ai hte maren, dai akyu hpyi hpawng shangut ai lamang hpe San Pawlu Nawku Htingnu kaba hta sha galaw bai galaw na re lam mung chye lu ai.

2021 shaning na Hkristan Hpung masha ni galung kahkying gumding lam a matu akyu hpyi lamang a matu shana shabra ai lam ni hte tau nau hkyen lajang ai lam ni hpe website mying Pontifical Council for Promoting Christian Unity hta shang yu la mai ai lam hpe mung Vatican Shiga Dap kaw nna ndau da ya ma ai.

Hkristan masha ni yawng arau hpawng de akyu hpyi na matu saw shaga da hkrum saga ai re. The World Council of Churches (WCC) kaw nna mung January 25 ya shani na “the Week of Prayer for Christian Unity” akyu hpyi hpawng hpe online hku shang lawm na matu saw shaga da nga ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2021-01/week-of-prayer-for-christian-unity-ecumenism-2021.html