Hkawnsek Maria gaw Karai Mungga Masha Tai Wa Ai Mungsung Lam Hpe Hpaw Tsun Dan Ai Wa Re Nga Wa Sarabyin Tsun Ai

Wa Sarabyin: Hkawnsek Maria gaw Karai Mungga Masha Tai Wa Ai Mungsung Lam Hpe Hpaw Tsun Dan Ai Wa Re

  September( 8), Nu Maria a shangai nhtoi shani, Wa Sarabyin Francis, Hkristan masha ni Hkawnset Maria hte shi kasha Yesu Hkristu a shalan shabran ya ai hpe hkam la let shan nu hta myit mada shara tawn da na matu shaw shaga da nga ai.

  International Marian Mariological Congress, mungdan shagu hta hpawng de let Kanu Nu Maria hte seng ai lam ni hpe sumru hkaw tsun sakse hkam ai lam ni hpe September (8 – 11) laman hta galaw na matu masat da ai rai nna, dai hpawng gaw (25) lang ngu na International Marian Mariological Congress re ai lam chye lu ai.

  Ga baw ginlam “theme” hpe gaw “Mary between Theologies and Cultures Today: Models, Communications, Perspectives” ngu ai rai nga ai. Jinghpaw hku gaw “daini na prat a Karai hpaji hte htung hkring lailen masa lahkawng yan a matu kasi la shara, matut mahkai htinglu htinglai ya ai, ningmu kaba ai Nu Maria” ngu ai rai nga ai.

  Wa Sarabyin gaw dai Congress hta lawm ai ni hpe, bat masum ya shani shagun mungga hte n-gun jaw da ai hta kadai n na lu ai, n mu n chye lu ai shara aten ni hta hkam sha machyi kaba hkrum nga ai ni hpe hkum malap ga ngu tsun da ai.

  Nu Maria gaw mungkan masha ni, shinggyim wuhpung wuhpawng masha ni e malap da hkrum ai, shanhte n mu lu ai ni a Kanu mung rai nga ai, ngu Wa Sarabyin Francis tsun da ai.

  Nu Maria gaw Sasana magam lam hta tsawm htap lam hpe shabyin ya ai, shinggyim masha ni hte mungkan/gintawng yawng a kaja lam matu daw jau ai wa rai nga ai; Shi gaw dai ni a nsen hpe madat hkam sham chye na matu sharin ya ai; shi hkum nan nsen n shapraw lu ai ni a matu nsen tai ya ai; mungkan hpe ningnan shangai ya ai, ngu Wa Sarabyin matut sakse hkam tsun dan da ai.

Myu Shayi Ni A Aten

  Karai hpaji hte rau Kanu Nu Maria hte seng ai hpaji ni gaw shawng lam hta gara hku sak hkrung nga sa ra ai hpe n-gun atsam hte hpaji jaw ya ai.

  Karai a Kanu Nu Maria gaw ra kadawn ai ni hte Karai Kasang a lapran galoi mung anga nga ai; shi gaw yawng a kanu, mung shawa masha ni a kanu, shinggyim lailen hte seng ai kanu rai nga ai. Nu Maria gaw mungkan mungdan, myusha baw sang shagu hpe shalawt ya ai kanu rai nga ai. Garan ginhka ai lam ni yawng hpe bai matut mahkai, ginlum kahkying gumding ya ai Kanu rai nga ai.

  Shyinggyim nau na shada tsaw ra garum shingtau hkat ai htung lailen hta hkawm sa ai hkrunlam ntsa hta anhte gaw, shinggyim num sha, Karai a kasa, Karai a kanu, hte Karai a tsaw ra dik manang rai nga ai Nu Maria a masin salum hpe hkap hkam la na matu Wenyi gaw anhte hpe shadut ya nga ai, saw shaga nga ai re, ngu Wa Sarabyin sang lang da nga ai.

  Nu Maria hte seng ai jawng ni gaw ndai aten, Kanu Nu Maria a aten rai nga ai hpe hkrang shapraw sa wa na ahkyak ai ngu Nu Maria hte seng ai hpaji hka ja ai jawng ni hta magam gun, jawng lung, hpaji hka ja nga ai ni hpe n-gun jaw da nga ai.

 Hkawnsek Maria gaw kun dinghku nta shagu hta Karai Mungga a lam sumru, tsun sang lang dan lu dik ai wa, Karai Kasang hte seng ai lam ni hpe hpringtsup grau ai hku hkap la lu shangun ai wa rai nga ai, ngu Wa Sarabyin Benedict XVI (hkringsa) a mungga hpe mung Wa Sarabyin Francis bai tsun dan da nga ai.

 Kanu Nu Maria gaw shi a prat hte nan Karai Mungga shinggyim hkum sa la ai mungsung lam hpe shadan shalen ya ai wa rai nga ai ngu Wa Sarabyin Francis September 8, Nu Maria shangai nhtoi hta hkaw tsun da ai hpe Vatican Shiga Shapoi Dap kaw nna ndau da ma ai.

Source; Vatican News

By Fr. Patrick Gawmaw Hkawng Yae

#vaticannews

#rvakachinservice