Hindu Diwali (Deepavali) Poi Nhtoi A Matu Vatican Kaw Nna Shagrau Mungga Laika Ndau Shapraw

Hindu Nawku Hpung A Diwali (Deepavali) Poi Nhtoi A Matu Vatican Kaw Nna Shagrau Mungga Laika Ndau Shapraw Dat Nga Ai Shiga

23 October 2019, Vatican City

Hkristian ni hte Hindu nawku hpung masha ni simsa ai hte rau jawm shanu nga pra lu ai, simsa lam hpe gaw gap ga, nga nna Hindu Nawku hpung a Diwali (Deepavali) poi nhtoi a matu Vatican kaw nna ndau shapraw ai ndau laika hta tsun dat nga ai.

Sau wan shachyi nna Mungkan ting na Hindu Nawku hpung masha ni poi galaw ai, Hindu Nawku hpung a grai ahkyak ai Diwali poi nhtoi a matu, Nawku hpung shada kanawn mazum lam hte seng ai Vatican ginjaw magam dap kaw nna shagrau mungga laika ndau shapraw dat ai rai nga ai.

Shaning shagu Vatican kaw nna ya na zawn sndau laika ndau shapraw ai lam galaw ai, dai ning na matu Diwali poi nhtoi gaw October 27 ya shani ang ai re, nga ai.

Nawku hpung shada kanawn mazum lam hte seng ai Vatican ginjaw magam dap lit hkam Cardinal Miguel Angel ta masat htu nna ndau shapraw ai laika hta, “Makam masham Nawku hpung langai hte langai lapran, nbung ai htung hkying langai hte langai lapran shada da hpu nau ni zawn mai kaja ai masa hte matut mahkai ganawn mazum lam ni nga wa hkra jawm shakut nga ga ai raitim, langai hte langai shada nkaw hkat ai lam, nsu nnawn galaw ai lam ni naw mu mada nga ai, nkau mi nga yang kaga Nawku hpung masha ni hpe nju ndawng ai lam ni du hkra naw nga nga ai hpe mu mada lu nga ga ai. Anhte shada hpu nau ni re ngu ai masa nmu mada ga ai majaw ya na zawn byin ai rai nga ga ai. Anhte Hkristian ni hte Hindu ni hku nna, shada hpu nau ni rai ga ai ngu mu mada nna, simsa ai hte rau jawm shanu nga lu lam hpe gaw gap ai ni tai ra ga ai” nga nna Vatican tsun dat nga ai.

Sawk sagawn tang madun da ai sum tang laika langai hta, dai ning na laman September shata du hkra, Hindu ni a adawt kasat lam ni a majaw hkala hkrum ai Hkristian masha marai 218 rai nga sai, lai was ai shaning hta hta mung hala hkrum ai Hkristian masha marai 292 nga ai, lai wa sai 2014 ning hta gaw marai 147 nga ai, ndai jahpan ni hpe yu yang adawt kasat hkala hkrum ai Hkristian masha jahpan htam lahkawng law jat wa ai masa rai nga ai, nga nna Ucan shiga dap shiga hta ka shana da nga ai.  

Source : Ucannews