Garum Ningtum Hpung “Caritas” Ni Hpe N-gun Jaw Mungga: Nanhte Gaw Ramma Ni A Prat Matu Ginsup Wang Shara Tai Nga Mu!

Garum Ningtum Hpung “Caritas” Ni Hpe N-gun Jaw Mungga: Nanhte Gaw Ramma Ni A Prat Matu Ginsup Wang Shara Tai Nga Mu!

Italy Mungdan kata na garum ningtum hpung “Caritas” a (50) ning hpring ladu hkrum shani a matu Wa Sarabyin Francis, mungga htawn da ai hpe, June 25, bat 5 ya shani, Vatican Shiga Dap kawn ndau da ma ai.

Dai ladu hkrum lamang hpe Vatican kaw nga ai San Pawlu Hkaw hta bat kru ya shani galaw lai wa ai rai nga ai.

Lai wa sai 50 shing Caritas hpaw hpang ai shaloi, “Nanhte gaw anhte a matu garum ningtum hpung” (You are our Caritas) ngu Wa Sarabyin Pawlu VI a mungga hpe lakap nna Wa Sarabyin Francis N-gun jaw da ai.

Wa Sarabyin Pawlu VI gaw Italy mungdan na Saradaw hpawng kaba hpe mung, Caritas hpaw hpang ai aten, garum shingtau ai lam hpe Vat II Council a matsun hte maren galaw sa ai gaw Hkristan a garum shingtau lam hpe grau nna shadan shadawng ai tai na re, ngu n-gun jaw da lai wa ai rai nga ai.

Wa Sarabyin Francis, Caritas ni matut manoi hkawm sa ra ai lam masum (3) hpe tsun dan da nga ai.

1. Kaji kajaw re ai kaw nna hpang ai lam: Dai kaji kajaw re ai kaw nna anhte hpang ai ngu ai gaw grai n law n la ai, kachyi chyi sha re ai kaw nna galaw hpang ai hpe tsun mayu ai. Alu bang garum shingtau ai gaw matsan dum lama ai magam galaw ai rai nga ai. Dai zawn galaw ai gaw kaji dik htum, n gun lagaw n rawng dik htum, matsan jam jau yak hkak dik htum ni kaw sa du garum ai lam rai nga ai.
2. Kabu Gara Shiga hte maren galaw hpang ai lam: ndai lam gaw kaja wa sha shagrit shanem ai tsawra myit hte galaw ai lam rai nga ai; shakawng shakat n mai re ai; tang madun ai ladat hte galaw ra ai; tara upadi jahkrat masat ya ai ladat hte n mai galaw ai. shawang tsawra myit hte galaw ai ladat rai nga ai; shabrai kumhpa myit mada na galaw ai bungli n rai nga ai. Yesu Madu shi a hkum hpe shinggyim hkum sa la nna daw jau ai myit hte asharawng ashara rai galaw ra ai. Alu atan galaw garum shingtau ai hta masha masat garan ginhka ai lam n mai galaw ai. Mu mada arung arai hpe garum ya ai zawn, wenyi lam hte seng ai hpe mung garum ya ra ai. Yesu Madu a hkye hkang la magam shinggyim myu sha yawng hpe jaw ya ai zawn rai ra ai.
3. Sawn shalat, gyin shalat chye ai ladat hte galaw ai lam: Ndai shaning 50 shaning hta na mahkrum madup hte rau dai hpe sha matut manoi kahtap kahtap galaw sa wa na matu n rai nga ai. San pra ai (Wa Sarabyin) Yawhan Pawlu II a matsun hte maren ra kadawn ai ni hpe akyu pru manu dik ai ladat hte gara hku garum lu na ngu ai hpe sawn shalat, gyin shalat nna garum sa wa na hpe madung da galaw sa ra ai. Matsan jam jau ai masha hte matsan jam jau ai lam ni law jat wa ai a majaw myit htum n mai ai; shanhte hpe nau na myit majing hte gara hku garum sa wa lu ngu ai mahkrun lam hte ladat hpe madun da sumru sa wa ra ai. Dai gaw myit mada lam hpe jaw ya ai, ngu Wa Sarabyin Francis lam masum hte n-gun jaw da ai.

Hpang jahtum hta Caritas hpung ni hpe chyeju dum ai lam tsun let dai magam hta shang lawm magam gun nga ai Jau, Ma Ma, Tarahkaw Sara, Apnawng Hpung Masha ni yawng hpe, ya na chyam bra ana Covid-19 tsin-yam hkrum aten ra kadawn ai ni law law nga nga ai hpe myit dum let atsam dat shakut shaja na matu hte grau nna, Ramma ni ndai magam hta shang lawm nga ga ngu Wa Sarabyin Francis hpaji jaw, n-gun jaw shadum jahprang da nga ai.

Vatican Shiga Dap kaw nna ndau da ma ai.

Source : Vatican News