February (7) Ya Shani, Lu Sha Gam Akyu Hpyi Na Matu

February 7 shani lu sha gam akyu hpyi na matu Myanmar mungdan Saradaw zuphpawng (CBCM) kaw nna ndau shana ai lam

Myanmar mungdan kata simsa lam lu na matu yaw shada nna jau ni woi awn let  nawku Hpung masha ni yawng Misa hkungga nawng jau na matu Wa Saradaw wuhpung zuhpawng (CBCM)kaw nna matsun da ai.

Cardinal Charles Bo a ndau laika gaw CBCM kaw nna ndau ai rai sai lam CBCM Amu Madu Saradaw John Saw Yawhan kawn bai ndau da ai hta “February 3, bat masum (3) ya shani, Cardinal Charles Bo ndau da ai “statement” ndau laika gaw CBCM kaw nna ndau ai lam rai sai,” ngu tsun da ai.

February 7, laban shani gaw Myanmar mungdan simsa lam lu na matu Misa Hkungga nawng jau, Chyoi Pra Hkum kawan, akyu hpyi na matu aja awa n gun jaw saw shaga da ai. Myanmar Mungdan a matu laksan yaw shada let hkying hkum (1) mi Chyoi Hkum kawan akyu hpyi na matu mung matu n gun jaw shaga da ai.

Cardinal Charles Bo a ndau laika hpe Jau ni hte tarahkaw Sara ni kawn nawku daw jau lamang ni hta Misa hkungga nawng jau ai shaloi na mungga hta shalawm na matu mung Saradaw ni kawn matsun da nga ai.

Myanmar mungdan hta byin nga ai mung masa lam hpe shadum jahprang myi jahpaw ya ai chyum daw ni hpe laban shani hte nawku daw jau lamang ni hta lata hti nna mungga htawn shana ya ai lam Jau ni hte tarahkaw sara ni hpe n gun jaw da ai.

Myanmar Mungdan simsa lam a matu yaw shada let nawku hpung masha ni Misa Hkungga nawng jau ai hta shang lawm ga. Bai, chyoi pra hkum kawan akyu hpyi ai lam ni hpe mung man man galaw ga ngu mung n gun jaw da ai.

“Mung shawa myit ra ai lam hpe madun  shapraw ai lam shagu  hta simsa ai ladat hte galaw sa wa ga”  nga nna  February 3 ya shani, Cardinal Charles Bo  shadum n gun jaw da ai.

Mungdan kata simsa lam lu la na matu man hkrum,hkrum shaga ai ladat hte bawng ban sa wa na matu mung seng ang ai ni hpe n-gun jaw shadum da nga ai.

Myanmar Mungdan labau hta yak hkak jam jau hkrum dik aten rai nga ai majaw akyu hpyi let mahtai tam sa wa na matu mung n gun jaw da ai.

Anhte Myanmar mungdan masha shagu gaw kasu kabrawng lam hpe koi yen let simsa ai hku mahtai tam sa wa ga nga nna Cardinal Charles Bo hpyi shawn da nga ai.

Myanmar mungdan gumsan magam, Mungdan ninghpung salang ni hte Asuya magam ni hpe lai mat wa sai February 1 ya shani Hpyendap kaw nna daru magam hkang zing lai wa sai majaw myanmar mungdan hta kasu kabrawng ai lam nnga ai sha simsa ai hte jet ai Democracy mungdan bai byin tai wa na matu yaw shada let Cardinal Charles Bo hte Myanmar mungdan Saradaw ni kaw nna ndai zawn ndau shapraw dat ai rai nga ai.

Translated By; Fr. Patrick Gawmaw Hkawng Yae ( Coodinator Of RVA Kachin )