El Salvador Mungdan Hta Kahtawlik Jau Langai Gap Sat Hkrum Lai Wa

Shanhte hpyi ai gumhpraw njaw ai ngu ai mara hte, El Salvador Mungdan na jau langai hpe n kaja ai masa hte mying gumhkawng nga ai lagut damya uhpung ni kaw nna sinat hte gap sat kau ai lam byin lai wa ai.

Asak 38 ning sha naw re ai Jau Cecilio Perez Cruz, lai wa sai May shata 18 ya, bat kru ya shana shi a Jau ginwang na Jau nta hta yup nga ai aten, dai ginra hta nkaja ai masa hte mying gumhkawng nga ai lagut damya uhpung ni gap sat ai hpe hkrum lai wa ai rai nga ai. Jau Cecilio Perez gaw El Salvador Mungdan Sosonate Saradaw ginwang na San José la Majada ngu ai jau ginwang a ginwang up jau re, nga ai.

Jahpawt manap hkying 5 aten hta jahpawt akyu hpyi lam rau galaw na matu jahkrum da ai majaw, hpung masha ni jahpawt jau jau e, Jau a nta de du sa wa ai shaloi, sinat pala hkang hte shi a gawk hta si rawng nga ai Jau hpe hpung masha ni sa mu kajawng lai wa ma ai. Jau a moi mang makau hta, lata hte ka da ai mai sau pa kaji mung jahkrat da ya ma ai, “Shanhte hpyi ai gumhpraw njaw ai majaw gap sat kau ai lam re” nga nna ka da let, Mara Salavatrucha uhpung nga nna ta masat htu da nga ma ai, ndai uhpung gaw dai ginra hta n kaja ai masa hte mying gumhkawng nga ai lagut damya tara tawt lai lam ni galaw nga ai uhpung re, nga ai.

“Jau Perez gaw hpung masha ni hte ni ni htep htep nga nna Jau ginwang a matu bungli grai shakut galaw nga ai Jau re, hpung mash ani mung shi hpe grai tsaw ma ai, ya na zawn gap sat hkrum lai wa ai majaw myit n pyaw lawm nga ai, Jau a matu akyu hpyi ya nga ga” nga nna Sonsonate Saradaw Ginwang a Ginwang up Saradaw tsun dat nga ai.

El Savador Mungdan asuya kaw nna mung ya na zawn Jau Perez gap sat hkrum lai wa ai majaw myit n pyaw ai lam tsun shapraw dat nga ma ai hte, Jau hpe sat ai masha ni hpe tara rung de woi bang lu hkra galaw na matu seng ang ai shim lam uhpung ni hpang de matsun jahkrat lam mung Asuya kaw nna galaw dat nga ma ai. El Salvador Mungdan gaw Mungkan hta, massa sat mang hkang lam law byin dik ai mungdan ni hta na langai rai nga ai. Lai wa sai shaning laman, ndai America ka-ang Mungdan hta masha marai 100,000 mi hta 50 jan daram shadawn shadang sat hkrum lai wa ai, ndai jahpan hku nga yang shani shagu masha marai 9 the 10 daram ram sat hkrum nga ai masa rai nga ai, nga nna Vatican shiga dap kaw nna shana dat nga ma ai.        

Source:Vatican News