Du wa na Mungkan Ramma Hpawng Kaba hta “ Order of Malta” Wuhpung ni kaw nna Tsi Gawn Lajang Garum Ya Ai Lam Galaw Ya Na

Kung kyang ai tsi Sarawun Sarama ni law law hpe gahkyin nna hpaw ning htan da ai “Soverign Order of Malta” ngu ai tsin gawn lajang wuhpung kaw nna, Panama Mungdan hta galaw na rai nga ai Mungkan Ramma nhtoi poi kaba hta, tsin gawn lajang garum ya ai lam ni galaw mat wa na re, nga nna dai wuhpung a lit hkam ning baw langai rai nga ai Sarawun kaba Dominique de La Rochefoucauld-Montbel tsun dat nga ai.

Rochefoucauld-Montbel tsun ai hta, “Panama Mungdan hta galaw na rai nga ai Mungkan Ramma nhtoi poi kaba laman hkamja lam the seng nna hpa yak hkak lam ni nnga pru hkra, mungdan kata na hkamja lam the seng ai wuhpung wuhpawng ni the jawm pawng nna, hkyak hkyak ra pru wa mai ai tsi gawn lajang lam ni hpe galaw ya mat wa na re, Genmany, Italy the France (Pyin Tit) Mungdan ni hkan na mahkrum madup law law nga ai kung kyang ai Sarawun Sarama ni marai 120 jan the tsin the seng ai arung arai ni, machyi masha htaw wa htaw sa galaw na maw daw ni 30 daram hpe poi lamang galaw ai shara hta sa da na re,” ng anna tsun dat nga ai.

Ndai “Soverign Order of Malta” ngu ai tsin gawn lajang garum ya ai wuhpung gaw, Mungkan Ramma nhtoi poi kaba galaw hpang wa ai 1984 ning kaw nna, Mungkan Ramma nhtoi poi kaba galaw ai mungdan shagu de sa du nna hkam ja lam the seng nna lit la garum ya ai lam ni galaw garum ya nga ai uhpung rai nga ai. Ndai lang na Mungkan Ramma nhtoi poi kaba hpe gaw Jan 22 kaw nna Jan 27 ya shani du hkra Panama mungdan hta galaw na rai nga ai the Wa Sarabyin Francis mung sa du shang lawm na rai nga ai. 

Krakow kaw galaw lai wa sai Mungkan Ramma nhtoi poi kaba hta mung ndai “Soverign Order of Malta” uhpung kaw nna kung kyang ai tsi sarawun sarama kaba ni, tsi the seng ai ap nawng masha ni marai 500 daram the machyi masha htaw wa htaw sa maw daw 30 dat nna garum ya ai lam ni galaw ya lai wa ai, ya ndai Panama kaw galaw na Mungkan Ramma hpawng de mung, Italy, Genmany the France (Pyin Tit) mungdan ni hkan na kung kyang ai sarawun kaba ni maraia 120 daram sa du na re, dai ni hta na marai 7 gaw Vatican hta ding run garum ya nga ai sarawun kaba ni rai ma ai, poi laman masha law ai the ramma ni law law shana n yup ai ni mung nga na rai ma ai majaw hkyak hkyak tsi lajang garum ya ra wa ai lam ni nga pru wa mai ai majaw ndai tsin gawn lajang uhpung a magam bungli gaw grai nan ahkyak ai nga ai.

Source : Vatican News