Du Hkra Ladaw Galai Shai Wa Ai Mang Hkang Lam Gaw Shinggyim Masha Yawng Hte Seng Ai Grai Ahkyak Ai Mang Hkang Lam Re, Nga Nna Wa Sarabyin Tsun

28 May 2019, Vatican

Du hkra ladaw galai shai wa ai mang hkang lam gaw shinggyim masha ni yawng, hpan da hkrum ai arung arai ni yawng hte seng ai grai ahkyak ai mang hkang lam re, nga nna Wa Sarabyin Francis tsun dat nga ai. Du hkra ladaw  galai shai wa ai lam hte seng nna tsun shaga bawng ban lam ni galaw na matu mungkan mungdan law law kaw nna sut gumhpraw hte seng ai hkring mang ni du hpawng nga ai hpawng hta lahta na zawn Wa Sarabyin tsun dat ai lam rai nga ai.

Wa Sarabyin tsun ai hta, “si hkrung si htan lam ngu ai hta grau nna, myat na sum na ngu ai lam ni hpe chyu madung da lam galaw nga ai prat aten masa hta anhte sak hkrung nga pra nga ga ai. Raitim mung, mungkan ting langai sha re ai bandung sharawt da nna dai bandung de du lu hkra shada madi shadaw shamyet shanat hkat let nga sa ra na aten madaw she rai nga ai. Sut gumhpraw hte seng ai hkring mang ni hku nna tinang a mung up du asuya ni myit hkrum daw dan matsun da sai bandung ni hpe lu la hkra magam bungli shakut galaw ra na rai ga ai,” nga nna Wa Sarabyin tsun dat nga ai.    

Grai nan tsang ra ai masa byin nga ai dai ni mabyin masa lam hte seng nna wa sarabyin tsun ai hta gaw, “dai ni na prat byin pru ai masa kumla ni gaw tsang shara masa rai nga ai, carbon dioxide dat nsa htuk shapraw ai lam ni law law galaw nga ma ai, ya na zawn mungkan nbung hpe jahten baza lam shabyin ai dat nsa ni htuk shapraw ai lam hpe ndai tsa ban shaning ka-ang hkup garai ndu shi yang jahtum hku nna jahkring shingdang kau lu hkra nbyin nmai galaw ra nga sai, nga nna kung kyang ai hpungtang hpaji ninghkirng ni tsun shadum sadi jaw da ai lam mung nga nga ai, dai re majaw, nra ai lam ni hpe galaw nna aten jahtum nga na hta, grau ahkyak ai lam ni hpe galaw ra na, anhte shanu nga ai mungkan hpe jahten shaza ai magam bungli ni hta ja gumhpraw jahtum jai lang nga ai masa hpe sharai ra na, jak sau ni hpe madung da shamyet shanat lam galaw ai sut masa hpe jahkring kau mat wa lu hkra galaw ra na,  clean energy ngu ai shi chyu bai jahpring wa lu mai ai atsam n gun ni, ga shadawn nbung, hka hte jan shingkang ni kaw nna shaw la mai ai tsam n gun ni hpe grau grau masan sa ai masa jai lang asung jashawn mat wa lu hkra galaw sa wa ra na, ndai ni yawng hta grau ahkyak ai lam gaw, sut masa galaw ai shaloi, shinggyim masha ni kaja wa ra ai lam hpe madi shadaw ya lu ai sut masa, shinggyim sari hpe shagrau shatsaw ya ai sut masa, matsn masha ni hpe pawn sharawt ya ai sut masa lam ni hpe madaw n gun dat galaw ra na ga ai, shinggyim masha ni hpe tsin yam law law hkrum shangun ai ja gumhpraw hpe chyu baw bang ai myit masa kaw nna lawt lu hkra garum ya ai sut masa lam ni hpe galaw shabyin ra na rai ga ai” nga nna zuphpawng hta du dung nga ai mungkan mungdan shara shagu na sut gumhpraw hte seng ai hkring mang ni hpe Wa Sarabyin tsun dat nga ai.

Source: Vatican News