Du Hkra Ladaw  Hte Seng Ai UN Hkumra Hpawng De Wa Sarabyin Video Mungga Shagun Jaw Dat

September 23 ya shani New York hta galaw ai mungkan mungdan ningbaw ni shang lawm nga ai, du hkra ladaw galai shai lam hte seng ai UN mungkan rap daw  hkumra hpawng kaba de Wa Sarabyin Francis kaw nna Video mungga shagun jaw dat nga ai.

Wa Sarabyin a Video sumla hkrung mungga hta,

“Ya na zawn du hkra ladaw hte seng ai hpawng hta Mungkan mungdan ningbaw kaba ni sa du shang lawm hkra ladat shaw nna hkumra hpawng hpe woi galaw nga ai UN mungkan rapdaw ninggawn amu  António Guterres hpe chyeju dum ai, ndai du hkra ladaw galai shai lam mang hkang gaw dai ni anhte a prat hta yawng myit ru nga ai ahkyak dik ai mang hkang langai nan rai nga ai. Ndai ahkyak mang hkang kaba hpe jawm yan hparan la lu na matu anhte shinggyim masha ni hta ahkyak ai atsam marai hpan masum nga na ra ga ai, dai ni gaw myit malang ai myit, tinang a lit re ngu nna yin la chye ai myit, nden ja ai marai hte gwi gwi galaw gwi ai myit ni rai nga ai. 2015 ning December 12 ya shani Pyin Tit Mungdan Paris hta galaw lai wa ai Mungkan mungdan ningbaw kaba ni a hkumra hpawng a myit hkrum daw dan lam a marang e, du hkra ladaw hte seng ai mang hkang lam gaw grai ahkyak ai hte hkyak hkyak hparan la ra na mang hkang lam re ngu ai hpe Mungkan mungdan ningbaw kaba ni dum chye wa masai rai nga ai. Myit hkrum daw dan lam lu la lai wa ai shaning 4 ning na wa sai raitimmung, tatut hkrang shapraw galaw saw a ai lam hta grai n gun yawm nga ai hte myit hkrum da ai ban dung de du lu na matu grai naw tsan nga ai hpe mu lu nga ai. Du hkra ladaw galai shai lam a majaw makau grup yin hten za lam ni byin nga ai hte, yak hkak mang hkang law law hkurm nga saga ai, raitim mung ndai lam ni hpe manga kau na matu aten masa ahkaw ahkang ni naw nga nga ai, ndai ahkaw ahkang ni hpe ntat jasum kau ga, anhte a nyan atsam marai ni hpe myit malang ai myit, tinang a lit re ngu nna yin la chye ai myit, nden ja ai marai hte gwi gwi galaw gwi ai myit ni hte asung jashawn jai lang nna ngang kang ai rawt jat bawng ring lam ni hpe masing masa jahkrat gaw gap ra na rai ga ai, shaloi she du wa na ban masha ni a matu mai kaja ai mungkan hpe anhte tawn da ya lu na rai ga ai. Du hkra ladaw galai shai lam mang hkang ngu ai gaw anhte a nga sat nga sa lam, shinggyim masha shada ganawn mazum lam hta tangman rap ra lam ngu ai ni hte matut hkri shaw nga ai. Kun rai ni hpe ganing re ai masa hte htung shapraw nna, dai ni hpe asung jashawn jai lang ai anhte a myit jasat ni gaw kaning re ai myit jasat re, shinggyim sari ngu ai hpe anhte gara hku manu shadan nga ga ai, ngu ai lam ni gaw du hkra ladaw hte seng ai mang hkang ni hte matut hkri shaw hkat nga ai. Dai re majaw anhte a nga sat nga sa sat lawat ni hpe dinglik yu nna gram lai ra ai lam ni hpe myit malang ai myit, marai rawng ai myit hte gram lai lam ni galaw na matu grai ahkyak nga ai”

nga nna du hkra ladaw hte seng nna UN Mungkan rapdaw hta galaw nga ai hkumra hpawng de Video sumla hkrung hte shagun jaw dat ai mungga hta Wa Sarabyin tsun dat nga ai lam Vatican shiga dap kaw nna shana dat nga ai.                 

Source : Vatican News