Dingda Sudan Mungdan De Sa Du Gawan Na Lam Wa Sarabyin Tsun N-dau Dat Nga Ai Shiga

Ya du wa na shaning hta African dan mungdan langai rai nga ai Dingda Sudan mungdan de sa du gawan lam galaw na re, nga nna Wa sarabyin Francis tsun ndau dat nga ai. Nov 10 ya, laban shani, San Peter pa kaba hta du hpawng nga ai shawa hpawng kaba hpe shani ka-ang Angelus akyu hpyi woi ngut ai hpang ya na zawn tsun ndau lam Wa sarabyin galaw dat ai rai nga ai.

Wa sarabyin shi sa du gawan na lajang nga ai African dan mungdan rai mnga ai Dingda Sudan mungdan a matu akyu hpyi ya na matu mung San Peter pa kaba hta hpawng nga ai shawa hpang kaba hpe Wa sarabyin tsun lajin lam galaw dat nga ai.

Wa sarabyin tsun ai hta, “Dingda Sudan mungdan hta mung masa lam hte seng nna  myit hkrum gahkyin lam ni bai lu la hkra n gun dat shakut nga ai uhpung ni yawng hpe kahtap nna bai tsun lajin dat mayu nngai, shada da hpu nau ni zawn mu mada hkat nna myit ga garan shangun nga ai lam ni hpe lai di kau lu hkra shakut galaw ga, Sudan mungdan mung chying sha ni nni nkri hkrum nga ai aten shaning ni nau nan na nga sai, grau mai kaja ai shawng lam gam maka ni lu la na hpe mung chying sha ni myit mada ra sharawng nga ma ai. Kasat gala majan mang hkang lam ni hpe shazim kau nna ngang grin ai simsa lam lu la hpe mung chying sha ni grai myit mada ra sharawng nga ma ai. Dai re majaw, mungdan a matu mai kaja ai mahtai ni lu la hkra, yawng ra sharawng myit hkrum ai mahtai ni pru wa hkra, yawng jawm dung tsun shaga bawng ban mahtai tam ai lam ni hpe nsim nsa matut galaw nga ga ngu na mungdan asuya hte seng ang ai mung masa ning baw ni yawng hpe aja awa kahtap nna tsun lajin dat mayu nngai. Mungdan kata shada da bai htingram hkat lam lu la hkra shakut galaw nga ai lam ni hpe mungkan mungdan ni hku nna mung nkabai da na re ngu myit mada ai” nga nna Wa sarabyin Francis tsun dat nga ai.    

2011 ning hta Sudan mungdan shang lawt lu la ai hpang, 2013 ning hta mungdan dinghku majan byin pru wa ai. Gumsan magam Salva Kiir hku nna, shi a ningtau gumsan magam Rieck Machar gaw asuya hpyen hpung ni hpe gahkyin la nna gumsan magam hpe tinyang kaw nna shayu kau na maw nyan ai ngu mara shagun ai kaw nna kasat gala lam ni byin pru wa ai rai nga ai. Ndai mungdan dinghku majan a majaw Sudan mungdan hta mung chying sha ni sen 4 jan si hkrum lai wa masai hte, kaga wan 4 daram mung hpyen yen ni hku nna yen hkawm ra nga ma ai rai nga ai, nga nna Vatican shiga dap kaw nna shana dat nga ai.    

Source _Vatican News