December 12 Ya Shani “Plenary Indulgence” Hkam La Lu Mai Ai Lam Hpe Wa Sarabyin Ndau Ai Shiga!

December 12 ya shani ang ai Guadalupe na Hkawhkam Jan Nu Maria “the Coronation of Our Lady of Guadalupe” poi 125 ning hpring masat dingsat hku Wa Sarabyin Francis kawn Kahtawlik Nawku Hpung masha ni “plenary indulgence” hpring tup ai indulgence chyeju hkam la lu na matu masat da ya ai lam chye lu ai.

Coronavirus zingli hkrum sha nga ai nawku hpung masha ni tinang a dum nta kaw nga ra ai raitim, hpring tup ai indulgence chyeju hkam la lu na matu Nawku Hpung hpa-awn Wa Sarabyin Francis kaw nna laksan chyeju hpe hpaw ya ai rai nga ai.

Tinang a dum nta kaw nga nna, 125 ning ladu hkrum ai Mexico, Guadalupe na Nu Maria poi hpe December 12 ya shani shang lawm akyu hpyi ai ni hpring tup ai indulgence chyeju hpe hkam la lu na rai nga ai.

Ndai zawn hpring tup ai indulgence chyeju hkam la lu na matu, Mexico mare kaba kaw na Cardinal Carlos Aguia Retes kawn masat laika htuk shapraw dat ai rai nna, “Apostolic Penitentiary” lit hkam Cardinal Mauro Piacenza mung dai hpe tara shang masat shagrin, ndau ya ai lam chye lu ai.

Indulgence Chyeju Hpe Gara Hku Hkam La Lu Na Lam

Masha langai ngai mara dam jaw hkrum ai lam nga ai rai yang, Indulgence Chyeju hkam la lu na matu lawu na hte maren galaw ra ai.

• Shi gaw nta kaw nga ai nawku tawn shawng de, shing n rai, akyu hpyi shara de sit sa nna Guadalupe na Nu Maria kaw akyu hpyi ra ai.
• December 12 ya shani, Mexico mare kaba na Nawku Htingnu kaba hta galaw ai Guadalupe Nu Maria Poi Misa Hkungga hpe “Online Livestreaming, shing n rai, Televised Mass” hpe myit masin hkrum hkrang yawng myit lawm kamhpa let shang lawm ra ai.
• Indulgence chyeju hkam la lu na matu Nawku Hpung matsun da ai hte maren “Wa Sarabyin a yaw shada ai lam” a matu akyu hpyi shalawm ra ai. Mara Raw Sakramentu hte Misa Hkungga hkam la mai ai aten hte shara hta, dai lam ni hpe hkrak tup hkan shatup let Chyoi Pra Hkum hpe hkam la ra ai.

Ndai lam ni hta na masum ngu na hpe gaw Hkam Ja Dap kaw nna shawa hpawng akyu hpyi ai lam mai galaw sai ngu ahkang jaw, shalawt dat ya ai shaloi hkrak tup hkan shatup ra ai lam laika hta matut matsun da ai.

Ndai Indulgence Chyeju hpe hkam la lu na matu Mexico mungdan masha ni a matu sha masat da ai n re ai. Mungdan shara shagu kaw nga ai ni yawng a matu masat da ya ai re lam mung Nawku Hpung masha ni hpe Cardinal Aguia kaw nna ndau da ya ai.

However, the Cardinal writes “Aware of the fact that the devotion to the Virgen Morena goes beyond our borders, the Holy Father thought it appropriate to offer this indulgence to all the Catholic faithful of the world to join in our celebration by adhering to the requirements of the Indulgence.”

Wa Sarabyin hkum nan tara shang ahkang jaw shagrin da ya ai re majaw mung, kam sham nna si mat sai masha ni a wenyi lawt lu lam re majaw mung, anhte hkum nan shut hpyit mara raw dat hkyam sa hpe hkam la sai dam kaw nna lawt lu ai majaw mung “Anhte a Chyoi Pra Dik Htum Ai Kanu Nu Maria a garum shingtau makawp maga bau sin ai matsan dum lama ai hpe hkam la lu na matu myit ra ai lam Cardinal matut tsun shapraw da ai.

“Mungkan masha ni yawng a jam jau ai hkrun lam hta anhte a Madu Yesu Hkristu hte Nu Maria (Saint Mary of Guadalupe) manang tai ya let tut nawng e shaman ya u ga; Daining gaw anhte a Kanu Nu Maria anhte kaw sa dam na hpe hkyen lajang nga ga; Anhte a chyinghka hpe hpaw da let anhte a myit masin salum shi hta myit jung nga shangun ga,” ngu Cardinal saw shaga da ai.

Guadalupe Maria Jubilee shaning hpe 2019, September shata kaw hpang ai rai nna, October 12 ya shani htum sai raitim mung 2021, October 12 ya shani du hkra bai matut sharen da ya ai lam chye lu ai.

Bai, Du na December 12 ya shani hta mung Wa Sarabyin Francis woi awn ai Guadalupe Maria Poi Misa Hkungga hpe San Peter Nawku Htingnu Kaba hta nawng jau na re lam mung chye lu ai.

Dai Majaw Nu Wa Hpu Nau ni e, December 12 ya shani na Guadalupe Nu Maria Poi masat dingsat Misa Hkungga hta yawng shawng lawm lu hkra shakut ga ngu Vatican kaw na ndau da ai shiga hpe RVA Jinghpaw Nsen Shapoi Dap kaw nna shalai ndau ya dat ga nngai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-12/pope-plenary-indulgence-our-lady-guadalupe-12-december.html