Danai, San Patrick Jawng Wang N-hpan Bai Kum Shatsawm Nga Ai. (14 Oct, 2020)

Kahtawlic Sasana, Myitkyina Saradaw Ginwang kata, Danai Jau Ginwang, San Patrick Jawng Wang N-hpan Bai Kum Shatsawm Nga Ai.
 
- Danai Jau Ginwang Ginjaw gaw Myitkyin Saradaw Ginwang Ginjaw kaw na dend (120) tsan ai rai nna Lidu lam n tsa kaw nga ai rai nga ai.
 
- Jau Ginwang kata, Kahtawlic Nawku Hpung masha ni nga ai mare (16) rai tim, dai hta na Mare (5) gaw, hpyen yen ra mat ai majaw ya ten hpung masha ni nga ai mare gaw (11) sha re ai lam chye lu ai.
 
- Ya Woi awn taw ai Ginwang Up Jau gaw Wa Jau Paul Nbau Zau Lat rai nga ai rai nna, San Francis Xavier hte San Lasaleth Sasana Ma Ma wuhpung ni, Danai myu hte Tarung mare hta Sasana magam gun nga ma ai.
 
- Tara Hkaw Sara gaw marai (36), Hpung masha hting gaw (960) jan nga ma ai. Hpyen yen tsin-yam hte (Covid 19) chyam bra ana zinli tsin-yam hkrum sha nga ten hta n myit mada ai, lai wa sai 1997 ning hta kum da ai, Ginwang up Jau Shanu nga ai, San Pratick Jawngwang (St. Patrick'Church) shakum gyi mat ai majaw 2020 October 4 ya shani kaw nna hkyak hkyak kum hpang taw sai lam chye lu ai.
 
- Bai, ya ten hta hkyak hkyak hpyen yen ni hpe R by R ngu ai shara jahkrat dum nta ni hpe gaw gap ya, kan bau magam lam a matu garum shingtau ya ai lam ni hte (Covid 19) makawp ai lam hta garum shang lawm nga ai lam, bai kaga mayak lam ni, ra kaji ra kaba law law hparan ra nga ai aten hta, hkyak hkyak wang shakum mung bai kum lai ra taw ai majaw, yak hkak ai lam ni nga nga ai, nga nna, Ginwang Up Wa Jau Paul Nbau Zau Lat tsun dan wa ai.
 
- "Wut n-hpan kum lai ra ai gaw, Pe (220) rai nga ai" nga nna, Danai Jau Ginwang Finance Kommiti kaw na Joseph Naw Hpwi Zau Hkawng kaw nna tsun dan wa ai.
 
- Ni ai tsan ai hkan nga ai chyeju madu, alu madu nu wa hpu nau ni kaw nna, Karai Kasang a mying ningsang hta byin mai ai made garum ya na matu ndai shiga hpe RVA Jinghpaw Nsen Shapoi Dap kaw nna ndau ya dat ga ai.
 
Matut mahkai mai phone hkringdat;
 
Wa Jau Paul Nbau Zau Lat
Ph. 09400052509
 
Slg. Joseph Naw Hpwi Zau Hkawng
Ph. 09899155512
 
 
Shana ai,
Sara Joseph Nhpang Naw Tawng

Add new comment

5 + 15 =