Covid-19 Tsin-Yam A Majaw India Mungdan Hta Jau, Mama 400 Lahta De Si Mat Sai

May 29, bat kru ya shani, Vatican kaw nna ndau ya ai shiga hta Covid-19 tsin-yam hta India mungdan na Jau 205 hte Ma Ma 210, April hte May shata laman hta si mat sai lam chye lu ai.

Indai Mungdan hta lahkawng lang ngu na chyam bra ana Covid-19 bai hta wa ai majaw India Jau, Ma Ma marai 400 a lahta de si mat sai lam India mungdan kata Nawku Hpung shiga shapoi ai hta ndau da ma ai lam Vatican kawn shalai ndau da ai rai nga ai.

May 29 ya shani, shiga jahtum ndau da ai hta Jau 205, Ma Ma 210 Covid-19 a majaw si mat sai lam, hta shinggyin jahpan hte maren chye lu ai. Jahpan n lu shi ai Saradaw Giwang mung naw nga ai lam chye lu ai.

Si mat ai ni a jahpan hta Saradaw marai masum: Pondicherry-Cuddalore na Hkringsa Saradaw kaba Antony Anandarayar, Jhabua na Saradaw Basil Bhuriya, Syro-Malabar, Sagar na Hkringsa Saradaw Joseph Pastor Neelankavil ni mung lawm ai lam chye lu ai.

Tsan ai ginra hkan nga ai Jau Ma Ma ni ya na zawn si mat ai gaw tsi tsi lajang la n lu ma ai majaw rai ma ai lam, shanhte law malawng gaw Nawku Hpung masha ni hte shinggyim wuhpung wuhpawng ni hta shanhte a prat hpe ap nawng daw jau nga ma ai majaw rai ma ai lam, shanhte a mungdan kata tsi rung tsi gawk n law ai lam, Jau Ma Ma ni gaw yak hkak ai mare, buga, lawk ni hta nga nna ra kadawn ai ni hpe yu lakawn let si mat ma ai re lam Wa jau Mathew Vatican de tsun dan da nga ai.

Ya na jahpan hta lawm ai si mat ai Jau Ma Ma ni gaw Saradaw Ginwang 98 hte Sasana Hpung 106 kaw na rai ma ai lam, Saradaw Ginwang ni hte Sasana Hpung ni gaw chyam bra ana tsin-yam hkrum sha nga ai masha ni hpe yu lakawn tsi lajang ya ai lam ni galaw nga ma ai lam mung chye lu ai.

India mungdan kata nga ai Saradaw Ginwang 174 kaw na, Covid-19 ana a majaw si mat sai Jau Ma Ma ni a jahpan hpe hpyi da ai lam Wa Jau Mahtew tsun dan da nga ai. Bai Ya na zawn India mungdan kata Covid-19 ana a majaw si mat masha jahpan law ai gaw, ana kap kumla n madun ai majaw tsi rung sa hpang hkrat ma ai masha ni law law nga nga taw ai majaw mung rai nga ai ngu mung matut sang lang da ya ai.

Ya na zawn si mat ai Jau Ma Ma ni gaw Karai Kasang ra sharawng ai lam rai nga ai sasana magam hpe galaw let, machyi masha ni hpe yu lakawn let, ana kap si mat ai rai tim sumsing mungdan hta ning ngai nga lu na hpe kam let myit dik myit pyaw daw jau lai wa ma ai ni rai ma ai, ngu mung Wa Jau Mathew shalan shabran ga matut tsun da nga ai.

India mungdan gaw Mungkan hta masha jahpan law htum hta na masat lahkawng shang ai mungdan rai nna, mungkan hta chyam bra ana kaba hkrum sha dik htum mungdan ni hta lawm nga sai rai nga ai.

Lai wa sai bat kru ya shani na jahpan hta coronavirus ana kanu kap masha ningnan 173,790 rai nna, mali shi manga (45) ya laman si masha shadang nem dik htum nhtoi re ai lam, dai gaw lani mi hta si mat ai masha shadang 3,617 re ai lam chye lu ai.

Vatican Shiga Dap kaw nna ndau da ya ma ai.

By Fr. Parick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2021-05/india-church-priests-nuns-deaths-covid19.html