Covid-19 A Majaw Tsinyam Hkrum Masha Ni A Matu Wa Sarabyin Akyu Hpyi Ya Ya Nga

Covid – 19 Mungdan shara shagu hta chyam bra magang nga ai rai nna, matsan jam jau hkrum sha nga ai, bungli kata rai nga ai ni, kaw si hpang gara hkrum sha nga ai ni lani hte lani grau law jat wa nga ai majaw Wa Sarabyin Francis gaw “Garum ningtum jaw nga ai chyeju madu ni yawng a matu anhte akyu hpyi ya nga ga ai. Hpang de matut garum ya lu u ga matu mung akyu hpyi ya nga ga ai” nga nna tsun da nga ai.

Nu Maria a yawn hkyen ai lam 7

1. Ma Yesu hpe Nawku Htingnu kaw ap ai shaloi, Sineon myit htoi htoi ya ai “Masen ai nhtu hte na a masing salum hpe galun htinggrang ya ai zawn rai na ra ai.” Lk 2:35
2. Ma Yesu hpe Egutu mung de woi hprawng ai.
3. Yerusalem kawn Ma Yesu hpe bai nhtang tam ai.
4. Nu Maria Madu Yesu hte Calvary kawng de U dang hpai lung wa ai ten hkrum hkat ai.
5. Madu Yesu U dang ntsa hta si hkam ai.
6. Madu Yesu a moi mang hpe shayu la nna, Nu Maria a lahpyen hta tawn da ai.
7. Madu Yesu hpe lup makoi mayang ai lam ni rai nga ai.

 “Nu Maria gaw shi hkum nan a matu hpa mung nhpyi yu ai.” nga nna Wa Sarabyin tsun ai. Matut nna mung “Yawng a Kanu tai na matu hkap la ai lam langai sha re” ngu tsun da nga ai. Nu Maria gaw Madu Yesu U dang ntsa kaw jen noi hkrum ai shaloi ndai gaw amying shingteng hpe hkam la sai re.

“Nu Maria gaw Kasha a amying shingteng langai hpe mung la kau ya ai nrai. Shi hkam la ai amying shingteng gaw chyeju kumhpa she rai nga ai. Dai Kanu ngu ai amying shingteng hte Madu Yesu a Kanu rai nga ai hte maren anhte mungkan masha yawng a Kanu mung rai nga ai. Kanu langai mi hku Madu Yesu hte anhte hpe lit la yu lakawn nga ai re.” nga nna Wa Sarabyin matut tsun sanglang da nga ai.

Mungga jahtum hta “anhte a Kanu Nu Maria hpe chyeju dum shakawn nga ga; shi a yawn hkyen lam ni hpe myit sumru nga ga” nga nna saw shaga da nga ai.

Matut nna mung April shata 3 ya shani 11:46 na shi ga hta  Covid – 19 ana zingli a majaw dum nta nlu mat ai ni a matu mung akyu hpyi ya ai lam na chye lu ai.

Anhte ni yawng mung Wa Sarabyin hte rau Covid -19 ana zingli tsinyam hkrum hkra machyi kaba hkam sha nga ai ni a matu Wa Sarabyin Francis hte myit hpawm let, matut manoi akyu hpyi ya lu na matu yaw shada let Vatican shiga dap kawn ndau shana da ai hpe RVA Kachin Service kawn shalai ndau shana dat ga ai.