Covid-19 Hte Seng Ai Hpang Jahtum Shiga

2019 December shata hta Miwa Mung, Wuhan Mare kawn chyam bra hpang wa ai Covid-19 Corona Virus kap bra ana zinli gaw dai ni ten du hkra matut byin nga ding yang rai nga ai re.  Virus byin ai aten ladaw laning mi jan wa sai raitim, ana hpa tsep kawp makawp ninghkap lu ai lam n galaw lu shi ai rai nna, ya ten hta Mungkan Mungdan nkau ni hkan ana hpe tau hkrau makawp maga lu na tsi ni hpe masha shagu gu gu ra ra htu lu na matu hkyen lajang nga ma ai.

Ndai tau hkrau makawp maga tsi (Virus ကာကွယ်ဆေး) ni gaw Corona virus hpe tsep kawp makawp maga ya ai ngu n lu tsun ai rai tim tsa lam shadang 70 kawn 90 du hkra makawp maga ya lu ai tsi mawan ni re lam chye lu ai.Myanmar Mungdan hta mung asak 18 ning lahta de na masha ni hpe Corona Virus tau hkra makawp maga tsi htu ya na matu ya ten hta jahpan hta nga sai lam chye lu ai.

2021 January 26 ya shani du hkra rai yang, Corona Virus kap hkrum masha Mungkan ting hta 100,286,772 (wan latsa sen lahkawng mun matsat hkying kru sanit tsa sanit shi lahkawng) kap hkrum nna, 2,149,496 (Wan lahkawng sen mi mun mali hkying jahku mali tsa jahku shi 6 asak si sum mat wa sai lam, dai hta na marai 72,313,625 ( wan sanit shi lahkawng sen masum mung mi hkying masum kru tsa hkun manga) bai mai tsai wa sai lam Corona Virus ana zinli a lam tang madun ai World Meter Infor website laika man hta ka da ai hte maren chye lu ga ai.

Mungdan hku rai yang America Mungdan gaw Mung kan hta corona virus kap hkrum masha law dik rai nna, kap hkrum masha 25,861,597 (wan hkun kru hkawt), si mat ai 431,392 (sen mali jan), num bat lahkawng hta India Mungdan kaw marai 10,677,710 (wan shi jan) kap hkrum ai kaw na 153,624 (sen mi jan) asak si sum mat wa sai lam chye lu ai.

Myanmar Mungdan hta dai ni 2021 January 26 ya shani du hkra corona virus kap hkrum masha 137,957 (sen mi mun masum hkying sanit jahku tsa manga shi sanit), Corona virus kap hkrum nna si mat ai masha 3,069 (hkying masum kru shi jahku), bai mai tsai wa ai masha 122,116 (se mi mun lahkawng hkying lahkawng latsa shi kru) rai nna ya ten hta machyi masha 12772 (mun mi hkying lahkawng sanit tsa sanit shi lahkawng) tsi tsi hkam la nga ai lam, shani shagu nnan kap hkrum ai masha yawm mat ai rai nna, Mandalay, Yangon hte Jinghpaw Mung hta virus kap ai masha nnan ni nga ai lam chye lu ga ai.

Nu wa hpu nau ni, Jinghpaw Mung Myitkyina hte Hpakant gyin ra ni hta mung shani shagu virus kap hkrum ai masha ni matut nga ding yang re majaw, tinang hkum tinang sadi sahka let Mungdan hkam ja dap hte seng ang ai Covid-19 makawp ninghkap wuhpung ni kawn matsun ai lam ni hpe tup hkrak hkan sa let nga na gaw grai ahkyak ai lam yawng hpe kahtap shana dat lu ga ai.

Thomas