Covid-19 Ana A Majaw mali ya laman India Jau 14 Si

India mungdan hta Covid-19 ana tsin-yam a majaw lai wa sai shata du hkra rai yang Kahtawlik Jau marai 20 daram si mat sai lam chye lu ai.

Ndai April shata 20 – 23 laman hta sha mung Kahtawlik Jau marai 14, Covid-19 ana zingli a majaw bai si mat sai lam mung chye lu ai.

India mungdan hta chyam bra ana kalang bai hta wa ai rai nna, Coronavirus ana kap masha grai law wa ai hte asak hkye oxygen nsa marawp jak gu ra hkra n lu garan lang ai majaw si mat ai machyi masha grai law sai lam India mungdan kata shiga shabra laika pa ni hta tsun da ma ai.

Masum lang ngu na chyam bra ana bai hta wa ai hta ana kap masha ningnan 346,786 rai sai  lam, ya du hkra ana kap masha yawng rai yang seng 16 du mat sai lam, United States ngut jang ana kap masha law dik mungdan rai sai lam, hkying hkum 24 laman hta sha ana kanu a majaw si ai masha 2,624 rai sai lam, tsang ra ai masha 189,544 rai nga ai lam India mungdan Hkamja Dap kaw nna ndau da ma ai.

Ya na zawn Covid-19 ana zingli a majaw, masum ya laman, Jau marai 20 si mat ai hta marai 14 gaw Covid-19 ana kap ai majaw si mat ai rai nna India mungdan Kahtawlik Sasana a matu tsang shara tai wa ai.

Ya du hkra rai yang hpang jahtum si ai Jau gaw Nagpur Saradaw Ginjaw kaw na asak 38 sha naw rai nga ai Wa Jau Lijo Thomas rai nna April 23 ya shani India sinna mungdaw na Chandrapur kaw nga ai Christ tsi rung kaba hta nnga mat ai lam chye lu ai.

Sasana magam gun hpung ni hte Sasana Ma Ma ni mung Covid-19 ana zingli kap ai ni hte si mat sai ni law law rai nga ai lam Vatican Shiga Dap kaw nna ndau da ya ma ai.

By Fr. Patrick Gawmaw Hkawng Yae

https://www.vaticannews.va/en/church/news/2021-04/india-covid-priest-deaths.html

24 April 2021, 17:58