Coronavirus Ngu Ai Ana Zinli Chyam Bra Nga Ai Majaw Miwa Gum San Mungdan Hta Nawku Jawng Ni Pat Da

Coronavirus Ngu Ai Ana Zinli Chyam Bra Nga Ai Majaw Mi Wa Gum San Mungdan Hta Nawku Jawng Ni Pat Da Ra Nga Ma Ai Shiga

Coronavirus ngu ai ana zinli chyam bra nga ai majaw Miwa gum san Mungdan shara law law hta Nawku jawng ni la pat da nga ma ai hte, ndai lai wa sai laban shani hta Missa hkungga laban nawku ni n lu galaw lai wa ma ai.

Ya byin nga ai Coronavirus ana zinli gaw, lai wa sai aten byin lai wa yu ai SARS ngu ai zinli hta grau sawng ai masa hte Mungkan mungdan law law hta chyam bra wa nga ai majaw WHO ngu ai hkamja lam hte seng ai mungkan uhpung kaw nna mung, mungkan shadang nna ahkyak shatai jawm manga ra ai zinli rai sai, nga nna ndau shana ai lam mung galaw da nga ai.

 January 31 ya shani na jahpan hta ndai ana zinli byin kap ai masha marai 9,000 jan, si ai masha marai 200 jan re, raitim 2 ya din ai hpang February praw 2 ya shani na jahpan hta ana byin kap ai masha jahpan 14,000 jan, si ai masha marai 300 jan rai sai re, nga ai. Matut nna shani shagu machyi si hkrum ai jahpan htam lahkawng daram ra tsaw jat ding yang rai nga ai.

Ndai ana byin hpang wa ai Miwa mungdan Hubei ginwang na tsi rung ni hta ana jep ya ai arung arai ni dum hprut wa nga ai majaw ana njep lu ai sha tsi rung kaw nna bai ginhtang wa mat ai masha ni mung law law nga nga ma ai majaw kaja wa ana byin kap nga ai masha jahpan gaw ndau shana da ai jahpan hta grau law na re, nga ai.

Hubei ginwang Wuhan Mare kaba na nawku jawng ni tsep kawp pat da nga ai majaw lai was ai bat ni hta Missa nawng jaw, laban nawku ku ai lam ni nlu galaw masai, kaga ginwang na nawku jawng ni mung la pat da ra na masa rai nga sai re nga ai.

Masha shada aloi sha kap hkat mai ai baw hpan ana zinli rai nga ai majaw Miwa mungdan na rung ni hpaji sharin jawng ni bat lahkawng daram pat da ra na masa re, nga nna mung tsun shajang nga ma ai. Kaga mungdan ni nhkan shanu nna jawng lung shing nrai magam bungli galaw nga ai Mi wa mungdan masha ni, lai wa sai Lunsi (Shaning nnan) poi wa lawm na matu Miwa mungdan de wa ai, ya poi ni ngut nna tinang nang bungli galaw, jawng lung nga ai mungdan ni de bai sa wa mayu nga ma ai raitim, ndai ana zinli a majaw mungdan kaw nna pru wa nmai byin nga ma ai.

Wa Sarabyin Francis kaw nna mung lai wa sai Jan 26 ya shani hta sha, ndai zinli a majaw si hkrum sai ni yawng Karai kasang a simsa ai hta ban sa nga lu mu ga matu mung, myit ru yawn hkyen hkrum nga ai ni hpe Karai kasang shalan shabran ya u ga matu mung akyu hpyi ya lai wa ai, ng anna Ucan shiga dap kaw nna shana dat nga ai.

Source : ucannews.com