Coronavirus Ngu Ai Ana Zinli Byin Kap Machyi Hkrum Nga Ai Masha Ni A Matu Wa Sarabyin Akyu Hpyi Ya

Miwa Gumsan Mungdan hta chyam bra byin nga ai Coronavirus ngu ai ana zinli byin kap machyi hkrum nga ai masha ni a matu mung, ndai ana zinli hpe hting hkang manga kau lu hkra shakut nga ai Miwa Gumsan Mungdan  mung chying sha ni yawng a matu mung akyu hpyi garum ya nga ai, nga nna Wa sarabyin tsun dat nga ai.

January 26 ya laban shani, San Peter pa kaba hta shani ka-ang akyu hpyi woi ngut ai hpang tsun shaga ai mungga hta, “Miwa gumsan mungdan hta byin kap chyam bra nga ai Coronavirus ngu ai ana zinli a majaw machyi makaw hkrum nga ai machyi masha ni yawng hte ni ni htep htep myit hpawm let akyu hpyi ya nga ai, ndai ana zinli a majaw asak si hkrum lai wa sai ni yawng hpe Karai kasang shi a simsa ai hta woi bang da ya rit ga, yawn hkyen hkrum nga ai dum nta masha ni hpe mung Karai Kasang shalan shabran ya u ga, ndai ana zinli hpe shing dang manga dang kau lu hkra atsam dat shakut shaja nga ai Miwa Gumsan Mungdan mung chying sha ni hpe mung Karai Kasang n gun ban ya nga u ga” nga nna Wa Sarabyin Francis akyu hpyi dat ya nga ai.

Miwa gumsan mungdan asuya hkamja dap kaw nna January 26 laban shani ndau shana ai lam hta, “ndai Coronavirus ngu ai ana zinli a chyam bra wa shangun  lu ai n gun gaw grau kaba wa ai zawn rai nga ai majaw, ana byin kap hkrum na masha jahpan matut grau law jat wa na masa nga nga ai” nga nna tsun shana da ai lam mung nga nga ai.

Ndai Wuhan Virus ngu ai Novel Corona Virus gaw, Miwa mung, Wuhan Mare hta 2019 December 31 ya shani kawn byin hpang wa ai rai nna, dai ni January 28 ya shani du hkra,  Miwa Mungdan hta ana zinli kap ai masha  hkying mali jan (4428) rai nga sai hte  virus a majaw asak si hkrum ai masha (108 )  jan sai lam, Taiwan, Hongkong, Macao hte Thai, Singapore, Malaysia, Vietnam, America, Germany, France hte Australia Mungdan  ni hta mung ana zinli kap ai masha ni mu ai lam ,dai mungdan ni a hkamja dap ni kaw nna ndau shana sadi jaw ai lam ni mung nga nga ai.

Ya na zawn lawan ladan mungdan shara magup masha shada kap hkat wa ai lam ni nga nga ai majaw, hkamja lam hte seng ai mungkan uhpung uhpawng ni kaw nna mung grai sadi maja let masam maram ai lam ni galaw nga ma ai, nga nna Vatican shiga dap kaw nna shana dat nga ai. 

Source : Vatican News